رواية الحادية عشرة الفصل الحادي والعشرون 21 بقلم ميرنا ناصر

رواية الحادية عشرة الفصل الحادي والعشرون 21 بقلم ميرنا ناصر

رواية الحادية عشرة البارت الحادي والعشرون

رواية الحادية عشرة الجزء الحادي والعشرون

رواية الحادية عشرة الحلقة الحادية والعشرون

=اتفضلِ يا سكر احب اعرفكم بزميلتكم الجديدة سكر
_انا من حقى اعرف احنا متجمعين التجميعه الغريبة فى الميعاد الاغرب دا ليه
_صباح الخير ياعم كامل
_اه هو صباح انا عارفه كويس
_مالك بس يا عم كامل فى ايه
_وانت كمان يا شيف فهمى عرفت غرام منين؟
_لا ما عدم اللامؤاخذة يا عم كامل .. انا جاى عن طريق سكر مش ست غرام
=اتفضل يا شيف فهمي فى ميعادك التمام
_خبر ايه يا غرام .. انا مش فاهم حاجة
=اقفل الباب ياعم كامل وتعالى هفهمك كل حاجة .. انا كدة ضيوفى كلهم وصلوا
“كان شكلهم غريب ويخض .. بس مضحك فى نفس الوقت
تخيلوا معايا لما تحط طبقات المجتمع كلهم وتخلطهم مع بعض .. الطبقة الغنية اللى بتملك اراضي، عقارات، مكانة مختلفة فى المجتمع، زى[ عز الدين، نادية الشيمي اخته] وعلى الصعيد الاخر سكر البنت البسيطة’او بمعنى اصح القادحة’ بجانبهم الشيف فهمي الامُي البسيط اللى بيحتكم على مال وموهبة تعيشه ميسور الحال
والفئة الرابعة رامى وفريدة البشمهندس والدكتورة اللي من عيلة متوسطة. مكس غريب وتجمع اغرب ما بينهم حاجة وحدة بس مشتركة’حبهم لغرام’يا ترى حبهم لغرام دة هيكمل؟”
=صباح الخير .. فطرتوا؟
_تصدقى بالله انا عيل ان انا رديت عليكِ وسمعت كلامك.. يعنى انتِ مجمعانا فى مكان غريب مع ناس اغرب عشان تسالينا فطرتوا؟! مهى نفس الجملة اللى قاعدة تردديها من الصبح
=استنى بس يا رامي انا بكررها عشان واحد جديد منكوا جه فمبيكنوش سمع الحوار
“طلعت ورقة من شنطتى واتنهدت وكلي خوف وبصيت في الورقة كويس .. وابتديت اتكلم بحماس”
=الفطار النهاردة هيكون مختلف هناكل عند ست عظيمة ‘هناكل عند ست خيرية اللى زوجها كان شغال على عربية فول توفاه الله وسابلها اربع بنات اللى فى اعدادى وثانوى واللى اتجوزت واللى فى جامعة كل دول هى بمثابة لاب وام ليهم’ومن وقتها ست خيرية هى اللى واقفة على عربية فول
فول حلاوته فوق الوصف لا يمكن تدوق الفول عندها وتعرف تتذوقه وتستمتع بيه فى مكان تانى … الجيزة كلها بتحكى عن شطارتها وتميز الفول بتاعها
_وبعد ما نفطر ياغرام ونتعرف على ست خيرية
=عيبك يا نادية انك بتحبى كل حاجه سريعة والبيزنس ومن الشاطرة لازم تكون متأنية وطويلة البال ..بعد ما نفطر المفروض انكم تتوزعوا على اقسام الجمعية.
«تحدث عم كامل فى تعجب»
_انتِ عملتي الاقسام خلاص يا غرام
=ايوة يا عم كامل خلاص …ماما كريمة هاتِ الحاجة اللى طلبتها منك امبارح
“بصوا الاهم من الشغل تظبيط الشغل .. دخلت ماما كريمة وهى بتحمل سِبورة اشترناها …وفى ايدها التانية اقلام كان كلها حماس يمكن كان حماسها اكتر منى بكتير”
«تحدثت ماما كريمة بمزاح متحمسة»
_احنا جاهزين يا كبيرة ..ناوية على ايه وهنعملوا ايه؟
«يضحك الكل بصوت عالِ»
“حملت السبورة من ماما كريمة وقُمت بتعليقها فى المكان اللى حددناه انا وماما امبارح وقسمت السبورة ست خانات
1.خانة الطهي (مشروع اكلة صغيرة) 2.خانة الهاند ميد 3.خانة الخياطة والتطريز 4.خانة محو الامُية 5. خانة الدوارات التمريضية 6.خانة الكوافير ….. بعدما انتهيت من كتابة الست خانات … اتنهدت وبصيت ليهم بعمق كنت بفحص تعبيرات كل وجه منهم.. كان فيهم اللى مستغرب، مندهش، اللى مش مجمع ايه الست خانات دول، اللى لسة مش فايق… استنوا كدة هو انا اصلا صح ولا غلط .. هنجح ولا لا؟ طب لو انا هنجح كل حركة بخطوها بخاف ليه!!”
«عز الدين فى انبهار»
_غرام انتى بجد هتعملى كل الاقسام دى فى الجمعية؟!
=ايوة يا عز وكل دة محتاج مدير سوشيال ميديا شاطر فوتوغرافر عظيم زيك انت وسُكر .. سُكر بنت شاطرة ويجي منها على فكرة
«نادية الشيمي بتردد»
_يعني تقصدي يا غرام ان انا همسك قسم الخياطة والتطريز؟
=دة يتوقف على قدرتك بين تنظيم وقتك … انا عارفة ان الاتيلية والمحل شاغلين كل وقتك لو هتقدرى تقومى بدة هيبقى عظيم جدا .. لكن لو معندكيش القدرة دي كدة كدة هتساعدينا اولا بأنك ترشحيلنا بنوتة من المساعدين بتوعك هى اللى تقوم بالمهام دي وثانيا انك معانا فى كل خطوة انتِ مش مجرد انك هتبقى ماسكة قسم انتِ منتمية للكيان دة خلاص
«تحدثت فريدة متبسمة»
_وطبعا انا هكون المشرفة على الدوارات التمريضية
=طبعا يا دكتورة فريدة .. ومين هيقوم بالمهمة دى غيرك بس المفاجاة انى هحاول بكل الطرق انها تكون معتمدة من وزارة الصحة.
« تسائل الشيف فهمي بتفكير»
_طب وانا يا استاذة غرام.. اكيد منتمى لقسم الطبخ بس يعنى هعمل ايه؟
=بص يا عم فهمى … انا عارفة انك شيف ممتاز القسم دة انا هعمله للي عندهم فن الطهي وانت هتساعدهم كونك شيف ممتاز تساعد كل موهبة فيهم انها تتمكن اكتر فى موهبتها تبدء هى تقرر وتختار مشروعها الخاص، تكون انت بمثابة الملهم لها.
«ماما كريمة تصطنع الحزن»
_خبر ايه عاد وانا فين فى الاقسام دي ان شاء الله
=انتِ الخير والبركة ياست الكل معايا طبعا فى قسم الهاند ميد .. اما انت يا بشمهندس رامي اكيد مش لاقى نفسك فى الخانات ما احنا مش هندرس ليهم هندسة يعني انت عندك موهبة الكتابة كل الست خانات هتكتب صياغة المناهج انت فى كل مرة
«عم كامل متعجبا»
_انت هتعملى مناهج كمان
=طبعا ياعم كامل ومذكرات وملازم كل حاجة هتكون مدروسة بكل دقة بجد
_عظيم يا غرام، مش قولت لكِ انك بطلة قبل سابق
=كله بدعمكم يا عم كامل صدقنى…. انا فخورة ان ليا اب زيك
«تتحدث ماما كريمة مشيرة الى السبورة»
_طيب وبالنسبة للخانتين دول يا غرام
=الكوافير ومحو الامية دول مهمة نادية وفريدة عليهم انهم يتواصلوا مع بعض لإيجاد شخصيتين لسد الخانتين دول يكونوا محل ثقة وقد المسؤلية
“تدخل ماما كريمة حاملة لنا اكواب الشاي ونفس السؤال بيتكرر جوايا هو انا خايفة ليه وكل حاجة متذاكر لها كويس او بمعنى اصح هو انا خايفة افشل ولا خايفة من طعم النجاح”
=انا كدة شرحتلكم كل حاجة قبل الفطار ورشحت كل واحد فى مكانة الصح دلوقت القرار قراركم اللى حابب يكمل كياننا هيكون ممتن بيه جدا واللى مش حابب او مش قادر كياننا هيفضل فاتح له ابوابه فى اي وقت
«سكر بحماس»
_انا معاكي طبعا
«ينظر عز الدين الى سكر متأففا»
_وانا كمان معاكي يا غرام
«فريدة تعانق غرام وتحدث مهللة»
_معاكي يا احلى بطلة فى الدنيا انا فخورة بيكى جدا
بص شوف غرام بتعمل ايه.
«ماما كريمة تنظر اليها وتتحدث بلطف»
_اسم الله عليكِ الله اكبر معاكى يا روح قلب ماما لو مكنتش انا معاكى هيكون مين
«رامي يتحدث مازحا»
_لو انا مكنتش معاكى يا حماتى مين هيكون معاكي
=اصيل يا جوز بنتي
«الشيف فهمي»
_انا كمان معاكي يا استاذة غرام دة مشروع عظيم ولازم اساهم فيه
«عم كامل ينظر اليها متفحصا»
=هو فيه حاجة ياعم كامل ولا ايه
_حاجة؟ حاجة وحدة ..دى حاجات عاملة تقسمي وتحطى ناس فى خانات وترشحي ناس وناس توافق وناس تشجع وانا مش مالى عينك ولا ايه ،انا فين فى الخانات دي
=انت الكل فى الكل يا سيد الكل
_ايوة ايوة كلي بعقلي حلاوة
=لا والله انت هتكون مسئول عن كل الحسابات وكل الايرادات اللى هتدخل الجمعية ومش بس كدة هتكون مسؤل عن كل التبرعات اللى برضو هتدخل الجمعية يعنى من الاخر انت هتكون ماسك كل الحسابات اللى هتدخل الجمعية وانا بس بتابع معاك
_لا اذا كان كدة ، بص شوف غرام بتعمل ايه
«ليهتف الجميع ملتفا حولها ويهتفون “بص شوف غرام بتعمل ايه …. بص شوف غرام بتعمل ايه”»
” كنت فرحانة حاسة بنجاح غريب ومخضوضة في نفس الوقت مش بيتردد غير صوت فى دماغي.. صوت واحد وبس’كملي انتِ هتوصلي متخافيش’»
=ايه يا جماعة لا داعِ للتصفيق دعونا نعمل في صمت
«يضحك الجميع لطريقة غرام المسرحية»
=طب ياجماعه دلوقت الساعة تسعة بينا علي الفطار
«عم كامل سائلا»
_لية يا غرام احنا نفطر هنا
=لا يا عم كامل .. عز الدين وسُكر بداية مهمتهم حالا
النهاردة هسجل اول فيديو من بعد الافتتاح قدام عربية الفول بتاعة الست خيرية وكل طاقم الجمعية معانا
«عز الدين في حماس»
_في ثوانى المعدات هتكون في اللوكيشين بتاع الست خيرية هكلم اصحابي هيوصلوا حالا
ـــــــــــــــــــــــــــــــــــــــــــــــــــــــــــــــــــــــــــــــــــــــــــــــ
“بعت اللوكيشين واتحركت على بيتي ولبست لبس كلاسيك وحطيت ميكب خفيف بصيت للمراية بتحدي واو يا غرام 70 كيلو ولسة…. خدت نفس عميق وبصيت وكلي اصرار انتِ بطلة، محاربة عظيمة، اوعي تخافي ، انجحي، انتصري، خليكي قوية، اطمحي، احلمي اكتر واكتر
نزلت ليهم اللوكيشين وقابلتني ست خيرية بكل ترحاب وابتدى عز الدين يجهز معدات التصوير”
«عز الدين فى حماس مشجعا غرام»
_احنا جاهزين .. غرام انتِ كويسة؟ خايفة ليه؟!
=مش خايفة يا عزالدين انا بس.. متوترة شوية… يلا بينا انا كمان جاهزة
“ركبولي المايك اتنهدت كان لازم اتخلص من كل التوتر اللي جوايا واكون اقوى من كدة لاحظي ان كل العالم هيشوف الفيديو دة سميت وابتديت كلام وانا الابتسامة مالية وشي”
=صباح الخير مع كل اشراقة شمس جديدة بينطلق نور وبيتولد معاه حلم.. حلم جديد لكل وحدة فينا يمكن اليوم مش بيمر مرور الكرام وبنفس نظرة الاشراقة العادية للست المُطلقة
بس من النهاردة هيمر اجمل واجمل… هيمر وانتِ شايفة حلم زمان كان جواكي بس انتِ لغيتيه بيتحقق … كارير كان نفسك تبنيه بس كان مهدود …حياه كان نفسك تعيشيها بس كانت سودوية… ظروف كانت صعبة وامر واقع كان لازم تتغلبي عليه عشان تعيشي زي ست خيرية اللى واقفة قدام عربية الفول بتاعتها … الام والاب لأربع بنات والدهم توفاه الله عافرت وحاربت… وربت وكافحت … وعلمت وجوزت من عربية الفول… من شئ شبه مستحيل… لفول بيحكي عنه الناس… والسياح بيحبوها وبيحبوا اكلها وإشراقتها هى وبناتها
حسيت بنجاح لما ست خيرية اتواصلت معايا وطلبت مني طلب غريب جدا… انها تدخلفى الجمعية معايا وتدعم المرأة وتديهم من عُصارة خبرة لتجربة مريرة عاشتها بس الطلب اللي كان اغرب… انها تدخل محو اُمية وانها عايزة تتعلم… كانت بمثابة الهام ليا فى تحضير الفايل بتاعي واقدم في كلية التجارة مش بس اكون حاصلة على معهد وخلاص
غرام في سن التلاتين هتبقى طالبة جامعية مستنياكم تشاركوني كل احلامكم .. كاريركم .. تعبكم ..مشاكلكم كلي اذان صاغية وبصدر رحب .. البيدج دة هكون بتواصل فيه معاكم لكل اللي بيدور في قلبكم وعقلكم واخيرا صباح الأمل يا من ولدتِ من الالم.
“الكل بيصفق وبكدة اقدر اقول… بص شوف غرام بتعمل ايه بقي”

يتبع……

لقراءة الفصل التالي : اضغط هنا

لقراءة جميع حلقات الرواية اضغط على : (رواية الحادية عشرة)