رواية طفلة أرهقت قلبي الفصل الأول 1 بقلم عائشة البشير

رواية طفلة أرهقت قلبي الفصل الأول 1 بقلم عائشة البشير

رواية طفلة أرهقت قلبي البارت الأول

رواية طفلة أرهقت قلبي الجزء الأول

رواية طفلة أرهقت قلبي الحلقة الأولى

#تعريف_للشخصيات
عائلة حسام
أمه سعاد 55 سنة ربة بيت، زوجها مصطفي، عنده محل عقارات وحالته الماديه كويسه، عندهم 3بنات( سلوي31 مدرسة متزوجه علي مدرس، عندهم زوز ولاد، سميره28سنة ممرضه متزوجه عدنان خو علي، يعني هيا وسلوي سلفات، وعندها بنت وولد، سندس 27 متزوجه خالد ضابط في الجيش، وعندهم ولد، طبعا سندس مقيمه هيا وزوجها في مصر إطرو يطلعو من ليبيا بعد سقوط النظام السابق)،
وولدين ( حاتم 30سنة موظف في شركة إتصالات، متزوج عبير بنت خاله مفتاح، عندهم ولد،
حسام وهذا بطل روايتنا، 25سنة كان يقرأ أدارة أعمال في بريطانيا، حسام شخصيته قويه ومتكبر وأناني وماعنداش روح مع المشاكل، لماصارت مشاكل بين مصطفي وخوته على الورثة، حسام كان يفتعل في المشاكل مع ولاد عمامه ومش مهني روحه، أطر بوه يبعده ويبعته يقرأ برا حفاظا على سلامته)
عائلة دنيا
أمها ناديه43 سنه دكتوره في الجامعه، بوها سعيد 48 مهندس مدني، عندهم بنت واحده( دنيا 15سنة تقرأ ثالثة أعدادي، وهذي بطلتنا دنيا طفلة الملامح، تفاصيلها جذابه، شخصيتها متوسطه بس ماتحبش حد يأمرها بشي لأنها مدلله من أمها وبوها لأنها وحيدتهم) طبعا قعدو فترة باش ربي رزقهم بدنيا، وناديه صارتلها مضاعفات بعد الولاده أطرو ينحولها الرحم، وسعيد لأنه يحبها مافكرش أنه يتزوج غيرها على خاطر الصغار وراضي باللي عطاهوله ربي
( عمام دنيا)
عمها مفتاح الكبير 60سنة، زوجته سالمه، عندهم 3ولاد( عصام متزوج سناء بنت عمه مبروك، عندهم ولد، عامر متزوج بنت خاله سميه، عندهم بنت، وعادل هذا صاحب حسام ونفس عمره، وعنده محل فضة واكسسوارات ) وبنتين(عبير متزوجه حاتم ولد عمتها، وعلا تقرأ ثالثة ثانوي)
عمها مبروك 56سنة، زوجته فوزيه، عندهم 3بنات( سناء زوجة عصام، وسنيه تقرأ ثالثة ثانوي مع علا بنت عمها مفتاح، وسرور أولى ثانوي) 2ولاد ( محمد 25سنة معيد في الجامعه، وأحمد يقرأ ثانية جامعه)
عمتها سعاد هيا نفسها أم حسام
عمها بشير 55سنة زوجته فاطمه مدرسة، عندهم 3ولاد( سامر 22سنة، سعد20، سامح18سنة)
( خالة دنيا )
ناجية 48سنة راجلها متوفي من حوالي 19 سنة بالتحديد بعد ماجابت بنتها الأخيره، بسبب حادث سيارة، عندها بنتين( خولة 24سنة متزوجه صلاح ولد جيرانهم، وإنتصار20سنة مخطوبه لولد عمها) وولد( مؤيد 22سنة)
دنيا تعالو نقوللكم شوية تفاصيل على حياتنا، طبعا ساكنين في مزرعة واحده احني وعمامي يلفها سياج واحد، المزرعه ورثه من جدو الله يرحمه، عمامي حالتهم عاديه جدا حتى الورثه اللي ورثوها من جدو مافيش حد إستفاد منها وضيعوها على دوة فاضيه، بابا الوحيد اللي شغل دماغه ودار منهم محلات وزوز شقق وأجرهم، حالتنا الماديه الحمدلله ممتازة وهالشيء اللي مخلي عمامي مايحبوناش ويجاملو فينا مجامله بس،
من حوالي 6سنوات عمتي إنتقلت جنبنا وبنت حوش في قطعتها اللي ورتثها من جدو في المزرعه، عمتي كانت ساكنه في جنب عيلة راجلها في منطقه ثانيه بعيده شويه علينا، بس لما صارت مشاكل بينهم اطرت تطلع وتسيب حوشها

 

 

“” موعدنا أرضك يابلادنا… مهما تغربنا وبعدنا “”
حسام على الفايبر، بإنزعاج🤨: أهلين ياأمي تي وينك من بكري نتصل وأنتي ماتردي
سعاد: والله ياوليدي ماسمعته كنت لاهيه مع دنيا
حسام زفر بغضب😤: دنيا دنيا دنيا، تي شني هالبنت ماعندهاش حوش تشده ولا كيف ديمه وهيا راقده عندك
سعاد بتوتر😟: تي أسكت ياوليدي توا تسمعك، ياناري البنيه من الصبح تاعبه معاي، كنا إنظفولك في دارك
حسام، بعصبيه😠: تسمع ولا ترقد، ماتهمنيش والله بديت نغار أني ولدك مش هيا راهو، وأنتي مافيش مره نكلمك إلا ودنيا دارت دنيا حطت دنيا جابت تي أمتي كبرت وصار منها أم شعر ليفه هذي
سعاد😞، تنهدت بيأس من كلام حسام، من صغره وهوا مش متقبل دنيا وديمه يدور في سبب يزعجها بيه ويخليها تبكي لما كانت صغيره، وأبتسمت😊: باهي ياوليدي أمتي بتطلع من، وسكتت لما خشت عليها دنيا
دنيا بإبتسامه😊: عميمه كملت أني لو كان ماتبي شي ثاني، بنروح !!
حسام أول مره نسمع صوتها من سبعة سنين لو كان صوتها هكي، زعما كيف شكلها !! تي أنت شن تقول من أمتي تفكر في الحاجات هذي، تكلمت بسرعه وسبقت أمي، وبغضب😠: باللهي روحي وشدي حوشكم وياسرك تنسريف، لو كان عندك خوت راهم شاكمينك مش دايره على حل شعرك

 

 

دنيا صدمني 😮كلامه ليش يحكي هكي !! أني شن درتله !! شني شاف مني !! باش يهيني بالشكل هذا😞 أنتي شكلك يادنيا نسيتي شني كان يدير فيك لما كنتي صغيره ونسيتي من هوا حسام هالمغرور الأناني، طلعت بسرعه من غير مانقول ولاكلمه وروحت جري لحوشنا
سعاد بغضب😠: شني هالكلام اللي قلته ياحسام عيب عليك شن شفت منها أنت باش تحكي هكي، حرام عليك والله دنيا مافي منها
حسام، بغضب😠: عارفتيني من قبل ماعنديش ليها خلوق، وبعدين طبيعي مدلله ولا حسيب ولارقيب أكيده إمدايره بلاوي غير أنتم ماتندرو على شي
سعاد: حرام عليك ياوليدي ماتتبلاش على الولايه، وبعدين عيب تفكر هكي ماعندكش ثقة في تربية خالك😒
حسام😏: خالي على عيني ورأسي ياأمي، بس عارفه أمها من يومها وهيا مسيطره وحاكمه وتشوفي في لبسها وشكلها كيف بتكون البنت يعني !!
سعاد: ربي يهديك ياوليدي والله المرأه عند خالك ليها عمر ماشفنا منها العيبه، اللبس والمظهر مش مقياس ماتحكمش على الناس من شكلهم الخارجي، وبعدين أنت ديمه شادلي هالموضوع ألهى في روحك ياوليدي وفكك من دوارة المشاكل
حسام🤨: لا خلاص أني تغيرت معاش يهمني حد إن شاءالله تتطربق الدنيا قدامي مادخليش غير خايف يلحقنا العار بس
سعاد بملل😪: تي عار شني الله يحفظنا هني روحك ولوح هالأفكار من رأسك، ماقتليش أمتي بتوصل طيارتك غدوه
حسام: س11 إن شاءالله، مع الإجراءات والتشحيط في المطار، نوصل فيكم الظهر بإذن الله
سعاد سكرت من حسام وهيا فرحانه وأخيرا بعد سبعه سنوات بيرجع لحضنها من جديد، بس خايفه عليه من تهوره ورأسه المسكر، وإذكرت كيف دار لما عرف أنهم طلعو من حوشهم لما كثرت المشاكل بينهم وبين العيله وسكنو بحدا خواله
Flashback

 

 

حسام بعياط وبعصبيه😡: أنتم كيف إديرو هكي كيف يضحكو عليكم ويطلعوكم من حوشكم ومنطقتكم، خايفين من كمشة مفرخ، غدوه مروح ولما نصفي أمهم كلهم،
مصطفي خدي التليفون من سعاد وهو يسمع في صوت حسام العالى، وبتحذير😠: هيا كلمه واحده أسمعني كويس تلهى في قرايتك وتهني روحك أني مش صغير لين يضحك عليا حد، ولا لين أنت توريني شني إندير وشني مانديرش،
حسام، بخجل: حاشاك يابوي مش هكي قصدي لكن واللهي مايصير منه هذا تي كيف، وسكتت لما قطع عليا بوي
مصطفي: ماتشغلش روحك ياولدي رزق الدنيا هذا يمشي ويجي ومادايم لحد، وأني من يوم يومي مانحبش المشاكل ولا عندي جهد باش نواجه عمامك ولا مفرخهم، أهم شي عندي أنت وخوتك بخير هذا اللي يهمني، ألهي في قرايتك وفكر في مستقبلك سلم ولدي وخليك من المشاكل والدوه الفاضيه
حسام بعدم إقتناع😐: باهي باهي يابوي هيا تصبحو على خير
Now
سعاد، بخوف😦: ربي يستر من اللي جاي ربي يهديك ياحسام وتهنينا وتهني روحك
دنيا خشيت للحوش وتنهدت بحزن😔، حوشنا كئيب جدا، ديمه هادئ وخالي من أي صوت، لما شفت الحوش كله قاعد مظلم عرفت أنه بابا وماما مازالو مارجعوش هذا حالهم كل ليله، بابا ديمه مشغول وماما الصبح في الجامعه والعشيه في العياده وماتروحش لبعد صلاة العشي، ياريت لو عندي أخت أو أخ يمكن يملو عليا حياتي الفاضيه شويه،
عمتي كانت الملاذ الوحيد اللي نقدر نهربله لما نمل من الوحده الكئيبه اللي في حوشنا، تنهدت بحزن😔 بس خلاص يادنيا حتى عمتك معاش تقدري تمشيلها أمتي ماتبي لما غذوه يروح المغرور هذاكا، بس هوا ليش قال هالكلام ليش يكرهني هكي، وإذكرت أخر مره شفته قبل مايسافر،
Flashback

 

 

دنيا طلعت من جنب أمي بعد إلحاح عمتي أني نطلع نلعب مع الصغار برا، كانو مقعمزين كلهم تحت الشجره يهدرزو ويضحكو، قربت منهم، وبإبتسامة😊: ممكن نقعمز معاكم
حسام، بهزوه😏: أهلا باأم شعر ليفه، لا واللهي للأسف مانقعمزوش مع العواويل أحني، خشي لأمك فيسع
عادل بإبتسامه😊: تحشم ياحسام، تعالي يادنيا قعمزي جنبي
دنيا إضايقت من كلام حسام وعيوني تعبو دموع🥺، بس إبتسمت😊 لعادل على كلامه، وقربت منه
حسام قدمت بسرعه ومسكت دنيا من إيدها ونجبد فيها بقوه لين وصلتها قدام حوشهم، بغضب😠: أنتي ياغبيه ماتفهميش قتلك خشي لأمك ومعاش تطلعي ناقصني مفرخ أني
دنيا نزلو دموعي😢 وخشيت جري، ديمه يهين فيا قدام الكل ويخليني نبكي، وكلهم يقعدو يضحكو عليا
Now
دنيا تنهدت بملل😪: والله كنت مرتاحه منه هالسنوات اللي فاتوا، حيي عليك يادنيا😨 أنتي قبل ماسلمتيش منه لما يجيكم زيارة يابال توا ساكن جنبك، يستر الله وخلاص،
لا أني معاش زي قبل أصلا، أعلى مافي خيله يركبه أخر همي😒، نفضت كل الأفكار اللي في عقلي، وتوجهت لمكتبتي نختار واحد من مئات الكتب اللي عندي نقضي عليه ليلتي، الكتب والمطبخ هما ملاذي الوحيد للقضاء على وحدتي، ونشغل في نفسي بيهم طول السنوات اللي فاتو
مصطفي، بتسأل🤔: إمالا دنيا وين !! تعودت نروح نلقاها معاك؟
سعاد، بتوتر😦: قبل شويه كانت إهنايا وروحت بالك أمها ولا بوها روحو
مصطفي، بإستنكار😕: لا لا ماهناش سياراتهم برا
سعاد خفت نقوله اللي قاله حسام، عارفه مصطفي غاليه عليه دنيا ومش راح يرضي فيها، بتوتر😦: والله ماعارفه، كملت معاى تجهيز دار حسام وقالت بنروح، مرات بترتاح تعبت ياناري من الصبح وهيا معاي يد بيد وتينا كل شي لغذوه
مصطفي، تنهد بأسف😞: مفروض بناتك هما اللي معاك في هالوقت، لكن الله غالب
سعاد، بحزن😔: ربي يهنيهم ان شاءالله، من يوم يومهم عارفهم رجالتهم مايحبوش الرفوع والجيبان، وبعدين حتى هما مشوار، قالو غذوه يجو بإذن الله
مصطفي😒: غير يحطو فيها في الرجاله، هما بناتك منكرات من يومهم مايحبوش التعب والقضيه وماهمش حنينات، مش عارفه لمني طالعين بس !!
سعاد، أكيده لعماتهم لمني بيطلعو يعني،😏 وأبتسمت😊: والله سندس كلمتني إمبكري وهيا تبكي ياناري البنيه إستاحشت وهو مسكر رأسه قللها لا نقدر نسافر معاك ومانقدرش نخليك تسافري بروحك
مصطفي، بهدوء🙂: هذاكم وضعهم خاص ناسيه خالد شني كان يخدم، معليشي تقعمز وتسمع كلام راجلها وتهني روحها توا بالك بعد فترة نمشولهم أحني منه نشوفوهم ونطمنو عليهم، ومنه الواحد يغير جو شويه ويريح نفسيته
حسام سكرت من أمي وبالي مشغول بيها مش عارف السبب، طول هالسنوات ولا مره لمحتها أو سمعت صوتها حتى لما نحكي مع أمي ولا خالي، عكس بنات خوالى الثانيات ديمه يتطفلو ويعرضو في أرواحهم لما نكلم في خوالي أو في واحد من الولاد، زعما كيف شكلها توا !! قاعده تبكي على أتفه شي زي قبل !! قاعده عيونها تلمع لما تفرح !! قاعده إبتسامتها البريئه تزين في وجهها !!
وزفرت بغضب😤: اااااااف أنت شني اللي قاعد تفكر فيه ياحسام، هيا دنيا الفرخه البكايه أم شعر ليفه وبس فاهم، حطيت رأسي على المخذه حاولت نرقد ساعتين قبل موعد الطياره
أشرقت شمس يوم جديد على الكل🌝🌞

 

 

مصطفي وولده حاتم، ومفتاح وولده عادل، ومبروك وولاده محمد وأحمد، بشير وولاده سامر وسعد وسامح، وعلي راجل سلوى وعدنان راجل سميره، كلهم في المطار ويستنو في طيارة حسام أمتي توصل، الرجاله الكبار مقعمزين الداخل، والشباب واقفين برا وجايبين النوبه ومجهزين الألعاب الناريه، ومتحمسين تقول عليهم يستنو في فوج الحجاج😅
حسام أول ماطلعت من غرفة الإنتظار راودني شعور لايوصف حزن على فرح، ماحدش راح يفهم شعوري إلا اللي عاشه، وأخيرا الواحد رجع لبلده بعد سنين غياب
“” وللغربه أوجاع لايعلم بها إلا من عاشها “”
للحظه إذكرت يوم اللي سافرت فيه وكيف سفرتي جت في لحظات وكيف بوي قرر من غير ما يأخذ رأيي
Flashback
مصطفي بعياط😤: على أخر الوقت يقولو ولد مصطفي خريج حبوس، وطيت رأسي قدام الناس، خليتني نوقف على اللي يسوي واللي مايسوي باش نحصل حد يطلعك، وياريتك حتي ندمان ومتحشم على وجهك وأعتذرت على عملتك
حسام بغضب😠: أني مش نادم أصلا المفروض قتلته وريحت الناس من شره ولد الحرام هذا
مصطفي بعصبيه😡: لا أنت شكلك مازال تبيلك تربايه، ماسدكش الإسبوع اللى قعدته في الحبس بين المجرمين
حسام بغضب😠: ليش كلكم تحطو في اللوم عليا، حسستوني أنه مش ولد خوك المصون هوا اللي هاجم على حوشنا ومامخلي مامقايل ويلود في المنطقه ويقول في كلام لايقبله عاقل ولا مجنون كيف نسكتله كيف !!
مصطفي🤨: مش حليناها هالمشكلة وجابه بوه وأعتذر أنت شني اللي خلطك عليه ثاني، تي أنت مدقدقه ومامخليش فيه عظمه صحيحه
حسام بهزوه😏: اعتذر صح لكن أني مافشيتش غلى، وبعدين هوا اللي قعد يلقح عليا في الدوه قدام ولاد الشارع تبوني نسكتله والله ماتنكتب عليا، يستاهل اللي صار فيه وأكثر، والله لو نحصل عليه مره ثانيه نقتله قتل باش يحرم يفكر يقرب من عيلتي مره ثانيه، ولا حتى يفتح فمه بكلمه
مصطفي بملل: أنت مافيش منك فايده الكلام معاك عمره ماراح يجيب نتيجة، أني حجزتلك على طيارة الليله لمصر ومن غاذي تطلع للندن فاهم
حسام بصدمه: أنت شني تقول !! ومني قاللكم نبي إنسافر أني !!

 

 

مصطفي: أني اللي قلت وقررت وخلاص هالموضوع منتهي وكل شي جاهز، أني ماعنديش جهد لمشاكلك لازم تتعلم الصبر وتعرف تتحكم في عقلك اللي فاضي هذا، مش كل شي ينحل بالمشاكل والضرب، وين تعقل وتكبر ودماغك هذا يستوعب هالحياة وقتها ترجع ومرحبتين بيك بينا أما توا فاأنت لازم تطلع من أهنايا وفي أسرع وقت لأنه ولد عمك مش راح يسكت وأني ماعنديش طاقه نخسر حد فيكم
حسام ماكانش عندي خيار إلا أني نستسلم للأمر الواقع ونرضي بحكم بوي مهما كان ظالم فهو أكبر مني وأوعي مني بهلبا وأكيده يفكر في مصلحتي أكثر مني
Now
مصطفي مشي بسرعه لما شاف حسام طالع من الداخل، وحضنه بفرحه☺: الحمدلله على السلامه ياولدي نورت بلادك
حسام بتأثر😢:الله إيسلمك يابوي، وباس على راسه وعلى أيده
مصطفي بفرحه ممزوج بدمعه😊😢: ربي يحفظك ياولدي ويحميك
حسام قعدت نسلم على حاتم وخوالي، وبعدها طلعنا وتلقوني الشباب، وبدت النوبه والألعاب النارية، تفاجأت بصراحه😮 واضحه حركات عادل الخفيف هذا😅
سعاد طالعه خاشه على الباب وتستني، ومره مره تتصل بمصطفي يقوللها أهو في الطريق شويه ونوصلو، وهيا فرحانه ومش مصدقه بتشوف ولدها قدامها بعد هالسنين
سميره🙂: خلاص ياأمي قعمزي شويه وأرتاحي، مش قالولك قريب يوصلو
سعاد، بفرحه☺: والله مانرتاح لين إنشوفه قدامي ونأخذه في حضني
سالمه: ربي يبرد نارك ياسعاد وتشوفيه سالم ان شاءالله
سلوى: الله لاتسامح اللي كان السبب في تغريبته وبعده علينا كل هالسنين
سعاد بحزم🤨: شني قلنا على هالكلام أحني، ردي بالك تجبدي هالسيرة قدام خوك فاهمه هوا بروحه واقف على سبله، أني ماصدقت أنه رجعلنا وإن شاءالله ربي يهديه ويحول هالموال من رأسه، وطلعو الكل يتجارو لما سمعو أصوات الكلاكس🔊 والألعاب الناريه✨🎆
حسام خشيت بسرعه وحضنت أمي، وبدموع😢: إستاحشتك ياغالية، ربي يطولنا في عمرك ياأمي
سعاد بدموع😢: ياروح أمك انت، الحمد لله ياربي اللي روي عيوني بشوفتك الحمدلله، ربي يحفظك ياوليدي الله لايغيبك إن شاءالله

 

 

شعور اللقاء بين الأم وأحد أبنائها، يعجز الكثير عن وصفه بدقه، 👌
الأم الحضن الدافىء لأبنائها، والوطن الحنون الذي ليس كمثله شيء، هيا أوفي شخص لك في العالم حتي وأن طال غيابك عشرات السنين
حسام سلمت على خواتي وإمساوين خالى والبنات والصغار جمهور ماشاء الله، لين دهشت😂
سعاد: هيا خلاص خلوه يخش يرتاح هيا تعالا ياوليدي
حسام أول مره نشوف حوشنا الجديد هذا، مش عارف شني اللي خلاني نشوف لحوش خالي سعيد اللي جنب حوشنا بلهفه يمكن فكرت أني راح نشوف هذيكا الطفله واقفه في مكانها المعتاد في المنور وتتفرج على الماشي والجاي، بس نزلت رأسي بأسف 😞 لما خاب ظني وماشفت حد، زعما وينها ليش ماشفتهاش بين الموجودين🤔، تحشمت نسأل عليها، بس مافيش بأس لو سألت على خالى بالك حد يجبد سيرتها أو شي😊
حسام، بتساؤل🤔: وين خالى سعيد إمالا ماشفتاش !!
مصطفي، بإبتسامه😊: سعيد أعتذر مني الصبح وقال عنده مشروع لازم يسلمه اليوم ضروري، بس قال راح يجي على الغذي
أحمد بهزوه😏: هوا عنده مشروع، والطرف شني عندها مش إمبينه؟ إن شاءالله مش موعد في إستراحه بس
محمد بغضب😠: مية مره قتلك أحترم نفسك وتكلم كويس، خير أمك يافرخ أنت
عادل بعصبيه😡: تي سيطرلنا على البلي خوك يامحمد، باهي اللي ماسمعه حد
حسام مافهمتش الشباب على شني يحكو، نضت وتوجهت لأمي اللي تنادي تبي توريني الحوش

 

 

شفنا الدور الأول، حسام بإعجاب🤩: ماشاء الله احلى من الصور هلبا مريح ومشرح
سعاد، بإبتسامه😊: أي كل اللي شافوه قالو نفس الكلام، خالك سعيد ماشاء الله عليه يفهم في كل شي هوا اللي وقف على كل شي لين سلمنا مفتاح الحوش وهوا كامل من مجاميعو ومش ناقصه شي، هيا تعالا نرقو فوق تشوف دارك
دنيا روحت من المدرسه دوشت وصليت وطلعت متوجهه لحوش عمتي، أول ماوصلت قدام الباب وقفت وأني مسيطر عليا الخوف😦، خفت كيف راح تكون مقابلتي مع المغرور !! كان كل مايشوفني لازم يهيني وينكد عليا كرهني فيه من صغري،😔
بس لا يادنيا أنتي توا أقوي مش ضعيفه زي قبل، وأخيرا تنفست بقوة ورسمت إبتسامة ثقة على وجهي😌 وتشجعت وفتحت الباب، بإبتسامه😊: السلام عليكم
حسام أول ماسمعت الصوت تبتو رجليا في الدرجه الثانيه لاعرفت نقدم ولا نؤخر ولا قدرت نتلفت مافهمتش شني اللي جاني وقتها، قعدت واقف وأني نسمع فيها تسلم، عرفت أنها قربت مننا من ريحتها اللي وصلت قبلها، ريحة البيبي اللي معتمدتها من لما هيا صغيره قاعده عالقه في خشمي😍 وزدت تأكدت أنها هيا لما أمي قالت أسمها
سعاد، بإبتسامه😊: مرحبتين يادنيا
حسام تلفتت وإنفتحو عيوني على كبرهم لما شفتها، هذي هيا معقوله😲أمتي كبرت هكي !! ، كانت أنثي بكل ماللكلمه من معني😍 جمالها جسمها ولبسها وإبتسامتها اللي تسحر🤤، كانت لابسه سروال جينز وبلوزه ثلاثه أرباع الكم وقصيره نوعا ما وقايمه شعرها الكيرلي بطريقه عشوائيه زايدتها جمال🤤 قعدت متنح ومش مصدق أنها اللي قدامي دنيا الطفلة اللي سيبتها تبكي أخر مره شفتها فيها قبل سبعه سنوات
“”” ياصغيره كبرتي😍🤤 “””

 

 

دنيا سلمت على عميمه، وتلفتت للمغرور اللي واقف جنبها، وبإبتسامة😊: الحمد لله على السلامة، ومشيت بسرعه قعمزت على الصالون من غير مانسمع رده، ماكنتش نبي نطول قدامه باش مانعطيشي مجال يستفزني أو ينرفزني زي قبل وتنهار قوتي وثقتي في نفسي😞
حسام على قد ماكنت مركز عليها بس ماسمعتهاش شن قالت وتفاجأت لما مشت من قدامي بسرعه، نزلت حتى أني وقعمزت في الصالون اللي مقابلها
سعاد، بإستغراب🤔: مش بتشوف دارك خيرك رجعت قعمزت ياحسام
حسام، بتوتر😟: أها أي بنشوفها، غير تعالي ياأمي قعمزي جنبي، مازال الوقت توا إنشوفها بعدين
أحمد، بإستفزاز🤨: وخيرنا أحني ياطرف مايتسلمش علينا ولا إيدينا إمسخات
محمد، بغضب😠: تي ريحنا يابلوه أنت
دنيا، بتساؤل: أنت تحكي معاي🙄؟
عادل، بإبتسامه😊: فوتيه يادنيا مادوريشي المريض هذا، وتلفت لأحمد 🤨: مش قالت السلام عليكم كيف حالكم ياشباب ولا ماتسمعش؟؟ عارفها من يوم يومها ماتسلمش، فكنا من جوك البارد😒
أحمد تجاهل كلام عادل، ولاكأنه سمعه، وبغمزه😉:أي الدوه عليك ياطرف أنتي
حسام بصراحه مش عاجبني كلام أحمد ولا حركاته، بس قلت خليني نشوف ردة فعلها كنت مستنيها تبكي أو تهرب، هكي تعودت عليها لما يكلمها حد تبكي وتختفي من قدامنا، بس صدمتني باللي قالاته🥴
دنيا، بهزوه وبإبتسامة مستفزه لأحمد😏: وأنت قتلها طرف ؟؟ ف مش معقوله طرف زيني تشوف أو تسلم على دسكه مخززه زيك😒
حسام فعلا الوقت يغير معقوله هذي دنيا !! نظرة الإعجاب واضحه على وجهي لما شفت قوتها وثقتها في نفسها اللي باينه من نظرة عيونها الحاده😍

 

 

الشباب كلهم أنفلقو بالضحك🤣😂على منظر أحمد اللي واضح بيتفجر ومش قادر داير شي، لأنه بوي وخوالي مقعمزين
عادل بضحكه😂: خزي يامهزب ماترتاحش لين تحصل كلمتين يطيحولك تاكم سنونك
سعد، بهزوه: معقوله تسكت لفرخه زيها مانعرفكش هكي 😏
محمد ناض بسرعه وجبد معاه أحمد اللي معصب وعيونه حمر من الموقف البايخ اللي حط فيه روحه، وطلعو برا
حسام نضت وقعمزت جنب عادل، وبهمس: متأكدين هذي دنيا !! تي كيف هكي🤔
عادل، 🤨: تي هوا أحمد يزربز، دماغه عيل بكل إمداير رأسه من رأسها، وبإبتسامة😊: دنيا والله ماشاء الله عليه ماشفنا منها شي الحق
حسام مش عارف ليش ماعجبنيش كلام عادل وشكرانه ليها، كنت بنتكلم بس سكتت لما طلعت سميره من المطبخ وقالت الغذي واتي، طلعنا الرجاله للمربوعه، وبعد الغذي أستاذنت منهم على أساس بنخش نرتاح شويه، بس لما خشيت وشفتها مقعمزه جنب أمي وإبتسامتها اللي تسحر مزينه وجهها الطفولي😍، نسيت الراحه ومايجي منها🤦‍♂️😅
سعاد، بإبتسامه: شني ياوليدي إن شاءالله غير عجبك الغذي؟؟
حسام، بإعجاب: ماشاء الله ياأمي زي العسل يسلمو أيديك وربي يطولنا في عمرك، والله الواحد هذا وين كلي وجبة مقومه تمسح على الكبد
علا طلعت من المطبخ وبإبتسامة: شني تشرب ياحسام شاهي أو قهوة؟
حسام: واللهي ياريت قهوه لو مافيهاش تعب
فوزيه: إمالا وين سنيه وسرور ياعلا؟؟
علا بإبتسامه لحسام😊: حاضر، وتلفتت لمرت عمها🙂: البنات يسيقو في المطبخ
سعاد،😏: مادامك بديري لحسام قهوة ياعلا إمالا ديريلنا كلنا نبو نشربو
حسام بصوت واطي لأمي: وين الشكران والمديح ودنيا ماشاء الله ودنيا ناشطه وفالحه ومامخليه نوع من أنواع المدح إلا وقلتيه فيها، نشوف فيها مقعمزه من لما جت وماتحركت من مكانها
دنيا لأني كنت مقعمزه في جنب عمتي من الجهه الثانيه سمعت اللي قاله هالمغرور، والله ماراح نسكتله، بإبتسامه مستفزه😏: اليوم الشحشحات هلبا كلهم مقدمين الولاء والطاعه ماشاء الله، ماعندي ليش متعبه روحي، لأنه اللي يجرو عليه ويخططوله هما أني مايهمنيش أصلا😒
حسام إنصدمت من كلامها لا هذي أكيد مش دنيا معقوله !! منين جابت هالجرأه هذي كلها😲، وتلفتت لأمي اللي تضحك على كلام دنيا🤨
سعاد، بضحكه😆: والله صادقه قبل مافي مره بنات خوالك جوني ولا خشو للمطبخ ولا دارولي حاجه، اليوم مش منهم ياحنه😉

 

 

حسام سكتت ماعرفتش شني إنرد عليها وبالأخص أمي مقعمزه مابينا
عبير مرت حاتم، بهزوه😏: شفت دارك ياحسام شني رأيك فيها باللهي؟؟
حسام: لا قاعد ماركبتش، خيرها !!
عبير: مش مريحه ألوانها تغم النفس قد ماقلتهم ماباش حد يسمعني
سعاد، بإستنكار: ماتسمعش كلامها ياوليدي والله تهبل غير توا تشوفها وأحكم بروحك، وتلفتت لعبير🤨: وأنتي ماطلب حد رأيك، هذا فاش فالحه غير في التفتفيت
عبير شبحت لأمها اللي مش عاجبتها معاملة سعاد لبنتها، وتحشمت من الموجودين وسكتت ونزلت رأسها لوطه
حسام بتساؤل🤔: مني اللي أختار الأثاث وألوان الدار ياأمي
سعاد، بإبتسامه😊: دنيا اللي أختارت كل شي، ذوقها ماشاء الله عليه في الحاجات هذي طالعه لبوها، ونضت بنشوف البنات في المطبخ
حسام تلفتت لدنيا، بإبتسامه😊: وشني الألوان اللي أخترتيهم يا ست دنيا؟؟
دنيا بنص عين😏: البلاك وال Grey
حسام كيف عرفت أني نحب الألوان الغامقه😮، فرصتك تستفزها ياحسام، وبتساؤل🤔: وليش ماأخترتيش ألوان فاتحه تفتح النفس، علاش الغوامق
دنيا، اللهم ماطولك ياروح، بإستفزاز😏: مافيش إلا الألوان الغامقه اللي تناسب السواد اللي في قلبك، ونضت بسرعه، وإستأذنت وطلعت توجهت لحوشنا
حسام طلعت وخلتني في حالة صدمه😲 معقوله هكي تفكيرها فيا !! كيف تقول هكي أني قلبي أسود !! كيف تحكم عليا بالشكل هذا !! نرفزني كلامها، ونضت بغضب😠، وتوجهت للدروج
سعاد طلعت من المطبخ، بإستغراب🤔: وين مشت دنيا !! وخيرك ياحسام مش بتشرب قهوه أهي واتيه، وين ماشي؟؟
حسام تكلمت من غير مانتلفت ولا نوقف: معاش نبي ياأمي، بنخش نرتاح شويه😤
سعاد، بشك🤔 إن شاءالله غير مش هوا ودنيا من جديد بس😓
حسام على قد ماكنت تعبان ومش قادر ساند طولي، ماقدرتش نرقد أو تغفي عيني ولا دقيقه، مافهمتش ليش نرفزني وعصبني كلامها، معقوله هكي نظرتها ليا، ماتنساش ياحسام كيف كنت تعامل فيها من قبل كيف تبيها تفكر فيك بشكل كويس، بس مهما كان مش لدرجة تقولي قلبك أسود، معقوله قاعده حامله عليا كل هالسنين هيا كانت صغيره هلبا كيف مانستش !!

 

 

دنيا حسيت روحي زودتها شويه، بس لا هكي كويس خليه من البدايه يعرف من هيا دنيا باش مايفكرش أنه يتعرضلي أو يهيني زي قبل، خشيت للحوش ولقيت ماما في المطبخ، بتساؤل: ماما مادامك مروحه ليش ماجيتيش لحوش عمتي؟ مش عارفه أنه ولدها مروح اليوم والعيله كلهم عندها
ناديه: عارفه عارفه، أصلا نستني في بوك قال شويه وجاي نمشي أني وياه شويه وبعدين بنطلعو عندنا مشوار
دنيا بعد إهتمام: باهي، وخشيت لداري
حسام قضيت باقي اليوم في داري بحجة أني تعبان من السفر ونبي نرتاح، حتي خالي ومرته لما جو مانزلتش على أساس راقد، بس كنت قاعد في صراع بين أفكاري، كيف طفله قدرت إدير فيك هكي ياحسام كيف !!
“” كان اللقاء لحظات… كيف أستطاعت ان ثبعتر مافي داخلي بلمح البصر “”
في مكان ثاني
……. بعصبيه: تي شوفلي مكان بأسرع وقت
….. بغضب: وأنت على مني تعيط بالك نخدم عندك وأني ماعنديش علم، أحترم نفسك وتكلم كويس
…….: تي باهي ياراجل مش قصدي الزفت غير متنرفز وراقيتلي
……: الحاجات هذي تبي وقت وتخطيط، مش ساهله صبلي نشرب، أصبر الصبر كويس
……..: أهو صابرين خلينا نشوفو أخرتها معاك
خالد، بغضب😠: ليش تنكدي على روحك وتنكدي عليا، مشيتي غادي فيها خطر على حياتي ليش مش هامك الموضوع وكأني مانعنيلك شي

 

 

سندس، ببكي😭: بس أني تعبت ليا خمسه سنين وأني صابره ومتحمله، بس فديت من هالعيشه أني نبي نرجع لليبيا، نبي نعيش في جنب أهلي لأمتي بنقعدو هاربين هكي
خالد، بعياط😠: لين ربك يفرج فاهمه، بالك تحسابيني أني مرتاح ومتهني، مني هوا اللي يرضي يسيب أهله وبلاده ويتغرب، بس الله غالب أني مجبور واللي صار أقوي مني
سندس، بعصبيه😡: أنت مجبور بس أني مش مجبوره، رجعني لليبيا أني مش ملزومه نتحمل هذا كله، تي هذي مش عيشه، محرومه من أبسط الأشياء، تي حتي خدمه تابته زي الناس ماعندك، شني ذنبي أني وولدك ننحرمو من أتفه الأشياء بسببك
خالد، بصدمه😲: معقولة اللي قاعد نسمع فيه أنتي كيف تقولي هالكلام، تشوفي فيا من الصبح لليل شاقي وتاعب باش ماينقصكم شي، شني تبيني إندير أكثر من هكي باش ترضي
سندس، بعصبيه😡: معاش تقدر ترضيني إلا أنك ترجعني أني وولدي لبلادي، ونضت خشيت للدار وقربعت الباب بقوة
خالد تنهد بحزن😔 كل ليله نفس الموال، بس هالأيام كثرت على ماوصوها، مستحيل تكون هذي سندس اللي حبيتها من قبل وكانت تقولي أني ديمه معاك على الحلوه والمره، شني اللي غيرها بس،
ياربي كيف بندير دلني كيف نتصرف مانبيش نخسر مرتي وولدي ونهدم بيتي، وفي نفس الوقت رجعتي لليبيا خطر على حياتي، أستغفر الله العظيم الله لاتسامح اللي كان السبب
فاطمه، بحقد: شفتها هاللفعه ناديه كيف ماجتش اليوم ولا خلت حتي خوك يجي، هذا كله تبي تبعده عليكم وماتبيكمش تختلطو بيه
بشير😞: أستغفر الله العظيم، أدوي دوة ثانيه وفكينا من تقطيع الناس في هالليل، بعدين كان نفهم بس شني الكره اللي صابه ربي في قلبك على هالمرأه
فاطمه، بكره: علاش أنت ماتشوفش فيها وفي تصرفاتها كيف الواحد بيحبها، تي واللهي بديت نتحشم نقول أنها سلفتي قدام الناس، والمدرسات اللي معاي كلهم يدوو عليها
بشير: لا حول ولا قوة الا بالله العلي العظيم، الناس هذا فاش فالحه غير في الدوه، ماعندك علاش تتحشمي المرأه في حالها وماشفنا منها شي، غير أخطوها أنتم بس
فاطمه، بعصبيه😡: وأنت شني قصدك باللي تقول فيه، عاجباتك حركاتها ولا مرواحتها كل ليلة في نفاصات الليل، هذا كله مش عار يشملنا كلنا

 

 

بشير: صبرك ياربي، تي عار شني الله يحفظنا منه، وبعدين المرأه تخدم على حالها وأني راجل ونعرف أكثر منك مافيش حد يقدر يشد عليها حاجه هذا باش يفتفتو في دوه فاضيه زي دوتك،
فاطمه بكره: وإلا عاجبك لبسها ومنظرها اللي تطلع بيه قدام الناس شكلها يحشم، ومش محترمه حد
بشير بعصبيه😡: يافالحه بالنسبه للبسها ومنظرها الله جميل ويحب الجمال، وربك عاطيها وهيا مهتمه بروحها شني العيب في الموضوع، وياريت بدل مالاهيه فيها أمتي طلعت وأمتي خشت وشني لبست، ماريها وتعلمي منها وأهتمي بمنظرك شويه، قسمآ باأيات الله عيشه تقصف العمر، واحد يخش يرقد خير مايقابل وجهك
مصطفي😏: وخيرهم بناويتك روحو على شني مستعجلين؟؟
سعاد بتوتر😟: صغارهم مدرسه، وحتى سلوي قالت عندها حصص غدوه ماتقدرش تغيب
مصطفي، بنص عين😏: وشني فيها كان غابو هاليوم، على أساس مازال فيه قرايه عليها القيمه هيا
سعاد🙂: حتى عيب يخلو رجالتهم يروحو اليوم ويولولهم غذوه والمشوار بعيد عليهم،
مصطفي😠: تي معاش إدوريلهم سبل، ليهم فوق الشهرين ماجوش، قيسه حتى خوهم ماهدرزو عليه زي الناس
سعاد، بملل😪: هوا حسام من بعد الغذي رقي لداره ومعاش إنزل قال تاعب بيرتاح، معليشي توا يجو مره ثانيه ويباتو ويهدرزو عليه لين يعيو
مصطفي، تنهد بأسف😞: طفي هالضي خلى الواحد يندفس أحسنله
حسام فات الليل كله وأني عاجز إنلاقي تفسير للي قاعد يصير معاي، كيف قدرت تسيطر على عقلي بلحظات،
فقت س 7 نومي كان متقلق مش عارف هل لأنه المكان قاعد جديد عليا ولا لأنها مسيطره على أفكاري،
نضت تعوذت من الشيطان وخشيت توضيت وصليت محاوله مني بالك نقدر نرتاح شويه، فتحت البلكونه ووقفت فيها، بس لفتت إنتباهي وتفاجأت😮 لما شفتها مقعمزه في المنور متاع حوشهم، شني إدير هذي !! ليش مقعمزه برا في هالوقت هذا !!
ماأنتبهتش لشي إلا لما لقيت روحي واقف قدامها، مش عارف كيف نزلت من الدروج !! وكيف طلعت من حوشنا !! وكيف تجرأت وجيتها !!
دنيا من عادتي كل يوم الصبح إنوض بكري ونحب نقعمز في المنور ونتأمل هدوء الصباح ونشرب قهوتي على رواق قبل مانطلع للمدرسه، بس أستغربت😲 لما شفته واقف قدامي، أخر شخص توقعت إنشوفه وبالأخص في هالوقت، تنهدت بملل😞، صبح يافتاح، ياربي فوت هاليوم على خير، وأبتسمت😊: صباح الخير ياحسام، باين أنك ماقدرتش ترقد أكيد لأنه المكان جديد عليك !!
حسام مش عارف قداش قعدت واقف قدامها وسارح لين تكلمت هيا وقطعت عليا تأملي فيها😍، بإبتسامه😊: صباح النور، تقدري تقولي حاجه زي هكي، بس أنتي شني اللي مخليك نايضه في هالوقت؟؟
دنيا😊: أني متعوده على هكي، خليني إنديرلك قهوه، شن رأيك؟؟
حسام، بإبتسامه😊: بصراحه مش راح نقول لا ياريت والله
دنيا: تمام، تعالا قعمز شويه بس ونجيك، ونضت خشيت للمطبخ

 

 

حسام إبتسمت على منظرها الكيوت😍وهيا بي بيجامة النوم وقعمزت، على شني تبتسم ياحسام على خيبتك😓 وين العصبيه متاع أمس راحت وين غرورك وكبريائك وقوتك، مش دنيا الطفله بس اللي تغيرت، لا حتي أنت تغيرت ياحسام😞
حسام بإستنكار لا أني ماتغيرتش بس هذا اللي قاعد في داخلي❤هوا اللي تغير ومش قادر نسيطر عليه، معقوله هذا كله صار معاك في ليله واحده !! لا واضح أنه هالشيء مش جديد ولاهو متاع يوم أو ليله😞🤦‍♂️
حسام تنهدت بحزن ورفعت رأسي لما لمحتها واقفه قدامي
دنيا كنت شاده سفرة فيها القهوه وكيكه، بس إستغربت من منظره، باين عليه مهموم ومش طبيعي من صوت تنهيدته وطريقة تنزيله لرأسه
حسام، بإبتسامه😊: شكرا، تعبتك معاي؟؟
دنيا😊: لا عادي ولايهمك، مش حاجه كبيره
حسام: قعمزي كملي قهوتك، ولا إمضايقك وجودي خليني نمشي كان هذا
دنيا، بسرعه: لا مش إمضايقني ولاشي، بس لازم نخش نوتي روحي معاش وقت، شويه ويجي الباص
حسام وقفت بسرعه: تمام إمالا خودي راحتك، وطبست قمت السفره، بإبتسامه😊: خلاص بعدين نجيبهالك أو تلقيها عند أمي
حسام رجعت للحوش وتحديدا لداري وبالضبط للبلكونه👌 وقعدت مقعمز وعيوني على الباب الرئيسي لين شفتها طلعت وركبت في الباص وأختفت من قدامي، بس طيفها مافارقش عيوني❤
“” لا زلت أتساءل هل هيا نفسها تلك الطفله البريئه التي تركتها من سنوات.. كيف تغيرت لهذا الحد.. كيف أستطاعت أن تأسرني بنظره… كيف !! وكيف !! وكيف !! “”

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية طفلة أرهقت قلبي)