رواية حكاية نور الفصل الثالث 3 بقلم روكا محمود

رواية حكاية نور الفصل الثالث 3 بقلم روكا محمود

رواية حكاية نور البارت الثالث

رواية حكاية نور الجزء الثالث

رواية حكاية نور الحلقة الثالثة

_ تتجوزينى ؟
احنا الاتنين اتصدمنا كل واحد فينا صدم التانى بحاجه لدرجه إننا مش عارفين نقول اى ولا نعمل ايه ؟ طب اقوم امشى ولا ايه هو تقريبًا هيقوم يطلع روحى فى ايده .
بعد مده من الصمت اللى بقى سيد الموقف زى ما بيقولوا… اتكلم اخيرًا
_ رجعتيلوا ليه ؟
اخدت نفس عميق وانا بفرك ايدى بتوتر من نظراته اللى محاصرانى من جميع النواحى
= رجعت علشان لسه بحبه للأسف ودى الحقيقه اللى لازم مش اقنع بيها حد لا انا بعترف بيها
كتم دموعه بصعوبه ..
_ الحب مش كافى اهم حاجه الاحترام والتفاهم والموده والرحمه والتقدير والإهتمام
ضغط على كلمه ” الإهتمام ” كمل كلامه بنفس الهدوء
_الحب دا ممكن يموت بعد الجواز لأن شغفه بيكى قل او انطفئ لأن خلاص بقيتى مراته يعنى تخصيه … ياما ناس اهتمت بالحب إنهم بيحبوا بعض بس مش متفاهمين نتج عن الموضوع دا إنهم انفصلوا ومن المحتمل ينفصلوا ويكون فى مابينهم اطفال ومش بيضر ف المواضيع اللى زى كده غير الأطفال يعنى يوم ما تختارى اركنى قلبك شويه على جمب وفكرى بعقلك هاتى ورقه وقلم واكتبى عيوبه ومميزاته وقارنى شويه العيوب اكتر ولا المميزات ، ولو لاقيتى عيوب اكتر من مميزات بتسبيه … وفكرى هل هو شخص يقدر يكون مسؤول عن بيت و زوجه واولاد ،، لكن مرتبطيش نفسك بحد لمجرد إنك بتحبيه حبك مع الوقت هيموت بسبب التصرفات

كلامه مظبوط بس انا متأكده إن عمر شخص نضيف من جواه وحتى لو فيه عيوب مع الوقت اكيد هيصلحها ويصلح من نفسه وانا هكون معاه
_ وقوليلى بقى ايه حجته اللى قالها ورجعتى كده عادى
= اتخانق مع باباه علشان شدوا سوا فى حوار إن عمر لى فلوس عند ابوه .. وابوه موافقش يديلوا منهم حاجه بس كده كلمه من ابوه وكلمه منه قل ادبه على ابوه راح ابوه اخد تلفونه وحبسه فى البيت شهرين فطبعًا علشان هو مش معرف حد من اهله إن فى واحده فى حياته عملى بلوك على السريع من غير مايقول السبب
ضحك لحد ما عنيه دمعت وبسخريه قال
_ وانتى مصدقه الحوار الفاكس دا ؟ طب تعالى نعقلها اول حاجه واول نقطه هتكلم فيها إن الواد دا بتاع مامى وبابى واهله اللى بيمشوه على عجين ميلخبطهوش .. شحط كبير يتحبس شهرين ومش بس كده لا دا يتسحب منه تلفونه ،، تانى نقطه ازاى هتأمنى على نفسك مع واحد قل ادبه على ابوه وطالما قل مره .. توصل إنه يمد ايده لما هو يقل ادبه على ابوه اومال هيعمل معاكى انتى ايه ؟! تالت نقطه ليه مش معرف اهله عليكى ولا جايب سيره عنك كل داااا ولسه عايزه تكملى مع البنى ادم دا متبقيش ساذجه للدرجه والحب يعمى عنيكى عن أخطاء كتير ياهتشوفيها بدرى ياهيعدى الوقت وتكونى ضيعتى مشاعرك وروحك مع واحد ميستاهلكيش
= وانت مالك انت هتعرف عمر اكتر منى ؟ شكرًا لكلامك بس عمر مش وحش كده للدرجه صفى نيتك اتجاهه
_ انا بقولك كده علشان ب…

سكت نظراته كفيله تعبر عن اللى جواه بس انا قلبى مش ملكى نظراته وجعتنى انا مكنتش متخيله إنه ممكن فى يوم من الأيام يحبنى انا دونًا عن كل البنات
_ خليكى كده هبله وساذجه وماشيه وراء قلبك ولاغيه عقلك وبكره يجى يقولك انا مريض نفسى وبتعالج ويدخلك فى دوامه إنه شخص توكسيك ولا يصلح التعامل مع البشر ومش بعيد يقلب عليكى الترابيزه وتبقى انتى التوكسيك وتعبتى اعصابه
خلص كلامه ومشى وسابنى لوحدى مع افكارى ومع كلامه وهل هو معاه حق ولا قال كده بسبب غيرته من أنى عاوزه عمر مش هو !
قومت علشان امشى لكن الصدمه خلتنى واقفه مكانى مش بتحرك ولا قادره امسك اعصابى … عمر داخل الكافيه وماسك ايد واحده وداخلين سوا ، فوقت بسرعه من صدمتى قبل ما يشوفنى وجريت وقفت فى زاويه بعيد .. رنيت عليه وانا ببص عليه ومتابعه ريأكشنات وشه اللى اتغيرت للضيق اول ما شاف رقمى
_ الو ياعمر انت فين
عمر بضيق
= فى البيت
قفلت فى وشه .. ومنعت دموعى إنها تنزل مستحيل يشوف نظره ضعف مستحيل .
_ لا بس حلو طلعت خاين وكداب
كان هيقع من على الكرسى من صدمته
= استنى بس هفهمك
زعقت بعلو صوتى

_ تفهمنى ايه ؟ تفهمنى بتخونى مع كام واحده … ولا تفهمنى إنك معندكش ضمير وبتلعب بمشاعرى عادى … انت ايه يا اخى استحملت قرف منك كتير واقول معلش هيتغير لكن على رأى المثل ” ديل الكلب عمره ما يتعدل ”
رد بكل برود وكلام جارح
= طالما انا وحش اوى زى ما بتقولى فأنتى اوحش .. انتى واحده مرتبطه بيا من ورا اهلك بتنزلى معايا من وراهم يعنى بتستغفليهم من الأخر .. واكيد عمرى ما هتجوز واحده مشيت معايا من ورا اهلها لأنك زى ما خونتى ثقه اهلك مش هتصونى بيتى وهتربى اولادى نفس تربيتك وميشرفنيش اتجوز واحده زيك ومعرفش اهلك ازاى سايبينك كده
كلامه وجعنى اوى مكنتش متخيله إن يجى يوم وحد يقولى كلام زى كده بس الغلطه غلطتى ولازم اتحمل النتيجه بس لوحدى
ضحكت رغم وجعى وقولتله بلهجه سخريه
_ ماهو اهلى سايبنى علشان احنا عيله بنعتبر الأشكال اللى زيك اخواتنا البنات
خرجت وانا شبه بجرى … لاقيت مروان بينادى عليا روحتله وانا بعيط الكلام لسه بيتردد ومع تكرار الكلام جوايا عياطى يزيد
_ بتعيطى ليه فى ايه مالك حصل اى
نبره صوته كانت كلها خوف ، اخدنى وروحنا مكان تانى هادى علشان اقدر اتكلم
حكيتله اللى حصل بس وانا من جوايا مش عايزه احكى لأنى كنت خايفه يشمت فيا ويقول الجمل المعروفه اللى اى حد بيقولها ف المواقف اللى زى كده ” منا قولتلك لكن انتى مسمعتيش الكلام وفى الاخر انا طلعت صح ”
بس هو خالف توقعى خالص !

_ احمدى ربنا إنك كشفتيه على حقيقته بدرى
مسحت دموعى وابتسمت
= الحمدلله
اتكلم معايا فى مواضيع كتير وبخفه دمه نسانى وبقيت بضحك بعد ما كنت بعيط … جت بنت صغيره بتبيع ورد
_ تشترى ورده ياطنط
حضنتها وهى حضنتنى جامد وكأن كل واحد فينا كان محتاج الحضن دا وإن حد يقدر يحتوينا بدون ما نقول إحنا محتاجين دا وانا للأسف مفتكرش ماما فى مره اخدتنى فى حضنها او بابا طبطب عليا .. اخدت منها كل الورد ودفعت تمنه وبزياده وفرحت لفرحتها إنها خلصت بدرى وهتروح البيت
_ انتى قلبك طيب اوى يانور
سرحت وانا بقوله بنفس الأبتسامه اللى مفارقتنيش من ساعت ما حضنتها
= تعرف الأطفال دول حاجه حلوه اوى نعمه من عند ربنا … إحساس أنى جبرت بخاطر حد حاجه قادره تفرحنى لسنه قدام،،

وهى طفله صغيره والعالم دا مرعب ولازم اساعدها واحتويها الحضن دا قادر يطمن قلبها
غمزلى بمشاكسه
_ طب ما تطمنى قلبى انتى كمان
سكت وملاقيتش كلام اقوله غير السكوت … اتنهد واتكلم بعقلانيه
= عارف انك لسه خارجه من علاقه فاشله ومقدر دا بس على الأقل نعمل خطوبه وهتعرفينى اكتر وصدقينى مش كله وحش زى ما انتى مفكره لا فى الحلو وفى الوحش … وانا بحبك والله العظيم علشان خاطرى ادينى فرصه افتحى قلبك للمره التانيه مش عايز غير فرصه واحده .. ونجيب الدبل ودستنين جاتوه وزغروطه وامك تبقى حماتى
ضحكت على كلامه الأخير ..ورديت وانا بضحك
_ وتجيب شاى العروسه
بصلى نظره حب .. ولاحظت ابتسامته اللى اول مره اكتشف إنها حلوه
= لا ما انتى العروسه
طلع ورقه وكتب عليها ” لا يهم كم يبقى لي من عمر، المهم أن أبقى معك العمر كله.”
تمت

لقراءة باقي حلقات الرواية اضغط على : (رواية حكاية نور)