رواية لن أعشق سواك الفصل الثالث 3 بقلم منى مرزوق

رواية لن أعشق سواك الفصل الثالث 3 بقلم منى مرزوق

رواية لن أعشق سواك البارت الثالث

رواية لن أعشق سواك الجزء الثالث

رواية لن أعشق سواك الحلقة الثالثة

نور: طب تمام اللحمه غسلتها اهيه تمام احطها في الحلة كده و نحط الخضار عليها كده و شوية التوابل الحلوة دي و بس كده… ايه ده لا ثواني معلقة سمنه كمان معاهم، نسيبهم عالنار ساعه كده و بإذن الله هيطلعوا فله
عمر : احم ايه يا نور لسه مصممه بردو تسممينا قصدي تغدينا؟
نور : هاهاها الغدا على النار يا بابا و لما تدوقه ان شاء الله مش هتتكلم تاتي
عمر : اكيد طبعا مفيش اموات بيتكلموا
نور : طب اتفضل بره المطبخ
( بعد ساعه)
‏نور : الله عليا الاكل شكله تحفه طب وربنا انا شيف رباني
( بتخرج نور و بتحط اطباق الاكل على السفره)
عمر : ايه ده اللي انا شايفه ده شكله هيعملها ولا ايه، يا رب الطعم يطلع زي المنظر القمر ده
‏نور : طب اتفضل دوق عشان مسمعش صوتك تاني
عمر : بسم الله الرحمن الرحيم.. صدق الله العظيم
نور : يعني ايه قصدك ايه
عمر بإبتسامة : هشمر الاول ياستي عشان الطعم الجامد ده ميتاكلش عادي كده
‏نور على وشها ابتسامه و فرحه فظيعه : بجد الاكل حلو؟ قصدي مش قولتلك هتاكل اكل حلو
‏عمر : و كان معاكي حق ياستي يلا خليني ٱكل بمزاج بقى
‏نور : ماشي اتفضل
‏عمر بعد شويه : ياه الحمدلله والله انا عمري ما اكلت طبيخ بالجمال ده
‏نور : عشان تبقى تصدق كلامي عموما بالهنا و الشفا
عمر ( بإبتسامة و هو بيبص في عيون نور) : تسلم ايدك و بيمسك ايدها بيبوسها
‏نور وهي متنحه و ضايعه في عالم تاني : اااا اممم تسلم ايه ده انت ازاي تبوس ايدي او تلمسني اصلا
عمر : ٱسف نسيت انك مراتي
نور : بقول ايه مش كل يوم هنتكلم ف نفس الحوار
عمر : خلاص يا نور حقك عليا انا ٱسف
( بيخرج عمر من الصالة و بيطلع اوضته)
‏نور : يخربيتك يا عمر.. اهدي يا نور احنا هنضعف ولا ايه لا افتكري خيانته ليكي و افتكري اللي شوفتيه
عمر : انا نازل هروح اقعد مع اصحابي شويه
‏نور : على فكره انا مسألتكش
‏عمر : ماشي يا نور.. سلام
( بيخرج عمر من باب الشقه)

‏نور : روح يا حبيبي اشكي حالك لاصحابك على ما اجهزلك انا المرحلة الجايه
( بعدها ب 3 ساعات)
‏عمر ( بيفتح باب الشقه)
‏‏نور : حمدالله على السلامه
‏عمر : بيبص عمر بيلاقي نور لابسه قميص نوم في منتهى الاثاره و حطه ميكب تحفه مع شعرها التحفه اللي نازل على كتافها
‏نور : كويس انك متأخرتش عشان الناس متقولش ده سايب عروسته و سهران بره.. انا مش ناقصه كلام الناس
عمر و هو لسه متنح و فاتح بوقه بس استجمع نفسه و بلع ريقه و قال لنور : اه ما انا عارف اكيد
نور : طب كويس
‏عمر و هو بيقرب من نور : ايه اللي انتي لبساه و عملاه في نفسك ده
‏نور : ايه غريبه اني البس كده في بيتي
عمر بعد ما قرب من نور اكتر : لا مش غريبه خالص بس هو الغريب اني اشوف ده و اسكت
‏نور : قصدك ايه؟
عمر في حركة مفاجئة بيلف ايده على وسط نور و بيقربها ناحيته : ايوه يا نور انتي نجحتي و انا مش قادر اكون ادد كلمتي انا بحبك
نور بتبعد ايد عمر و بصوت عالي : انت اتجننت انت ازاي تعمل كده ابعد عني انا مش بحبك انا بكره اليوم اللي شوفتك فيه
عمر بصدمه : نور الكلام ده من قلبك؟
نور : جدا من قلبي جدا
‏عمر : ماشي يا نور من هنا و رايح احنا هنعيش اخوات سوا لحد ما المهله تخلص و كل واحد يروح يشوف حياته
( بيخرج عمر من الصاله و بيطلع اوضته)
نور بتقعد عالكنبه و هي مصدومه و بحزن بتقول : كل واحد يشوف حياته؟! يعني انت رسمت و خططت لحياتك بعدي؟ يعني انا كنت مرحله في حياتك مكنتش حياتك كلها زي ما كنت بتقول؟ ياااه يا عمر..انا كده فهمت كل حاجه، وحياة حبك اللي كان كل دنيتي لا هتشوف نور تانيه خالص غير اللي عرفتها
___________________________________________

نور : الو..ايه يابنتي وحشتيني يا ٱيه عايزه اشوفك يا ندله
ٱيه : والله وانتي كمان وحشاني اوي يا حبي بس يعني انا لحقت اوحشك ده انتي لسه مخلصتيش شهر العسل يا بنتي
نور : عسل؟!.. المهم انا عايزه اشوفك ما تيجي ننزل نتقابل في اي حته
ٱيه : وليه في اي حته ما اجيلك شقتك على طول حتى اباركلك و اتفرج على عش الحب يا عروسه
نور : ماشي اللي تشوفيه هستناكي النهارده
ٱيه : تمام هكون عندك الساعه سبعه
جرس الباب بيرن و نور بتفتح الباب
نور : يا بنت اللذين وحشتييني
ٱيه : و انتي كمان جدا والله، طمنيني عامله ايه يا عروسه
نور : الحمدلله ماشي الحال
ٱيه : اممم ماشي الحال؟ ايه يابنتي الاحباط ده اومال فين انا طايره من الفرحه و اه لاقيت الطبطبه ده انتي اتجوزتي حب عمرك اللي قصتك معاه هينزلوها في رواية قريب تقريبا ههههههههه
نور ( بإبتسامة حزينه) : الحياة مش كلها وردي يا ٱيه كل حاجه فيها مشاكل و صعوبات مفيش حاجه سهله
ٱيه : الله يطمنك يا ستي شكرا على جرعة الاحباط دي
نور : مش قصدي احبطك والله و بإذن الله ياستي نفرح بيكي انتي واحمد عن قريب
ٱيه : ااه يا نور ادعيلي كتير بالله عليكي
نور : بدعيلك والله و صدقيني احمد جدع اوي ولا يمكن هيخليكي تندمي في يوم على حبك ليه
ٱيه : تفتكري احمد هيعمل زي عمر و هينحت في الصخر عشان جوازنا يتم؟
نور : يعمل زي عمر؟ لا ياستي هيعمل اكتر من كده بإذن الله و هنفرح بيكم قريب و بكره تشوفي
ٱيه : صحيح انا اتلهيت فيكي و نسيت اسأل اومال عمر فين؟
نور : فوق في الاوضه
ٱيه : فوق في الاوضه ليه؟ اوعي تقولي نايم
نور : لا عادي هينزل دلوقتى
ٱيه : طب ما تندهيله يا بنتي ده انا نفسي اشوفه جدا

نور : طب استني هطلع اندهله
بيظهر عمر على السلم فجأة : ٱيه عامله ايه؟ وحشاني والله
ٱيه : يا عمر و حشتني اكتر والله الف مبروك يا عريس
عمر : الله يبارك فيكي و عقبالك انتي و احمد بإذن الله
ٱيه : ٱمين يا رب يسمع من بقك ربنا..يلا انا هنزل بقى عشان الوقت اتأخر
نور : نعم..انتي بتهزري؟ انتي لحقتي تقعدي معايا
ٱيه: اقعد معاكي ايه بس يا عروسة ده مش وقت قعاد خالص
عمر : مينفعش يا ٱيه الكلام ده لازم تتعشي معانا
ٱيه : يا سيدي الايام جايه كتير و بإذن الله نتعشى و نتغدى مع بعض بس مش في شهر العسل يا عريس و عموما انا عايزه بإذن الله لما اجيلكم ٱكل جاتوه حلاوة البيبي الجديد بإذن الله
عمر بإبتسامة سخرية : اه بإذن الله عموما استني انا هنزل اوصلك
ٱيه : لا لا انا بابا هياخدني بالعربية و بعدين قولنا مفيش نزول ولا اي حركة من هنا يا عريس لحد ما تثبت الرؤيه و نسمع الخبر اليقين ان ولي العهد في السكه
نور : ماشي يا ٱيه خلي بالك من نفسك و كلميني لما توصلي
ٱيه : حاضر يا ام العيال خلي انتي بالك من نفسك و من عريسنا و من ولي العهد بإذن الله
بتخرج ٱيه من الشقه‏
عمر : ممكن افهم بقى انتي قولتيلها ايه وولي عهد مين؟
نور : افندم؟! يعني ايه مش فاهمه كلامك
عمر : لا انتي فاهمه كلامي كويس.. قولتي و حكيتي لٱيه ايه بالظبط؟
نور : انت مجنون.. هكون حكيتلها ايه يعني دي واحده جايه بتبارك لاتنين عرسان هتقولهم ايه غير كده بقولك ايه متخليش الخوف ياكل في قلبك اوي كده
عمر : للمره الاخيرة يا نور لو مبطلتيش اسلوبك ده صدقيني هتشوفي مني وش تاني
نور : اسلوبي؟ انت بتهددني ؟ طب يا عمر اعتبرني مغيرتش اسلوبي.. احب اشوف بقى وشك التاني شكله ايه
عمر بيقرب من نور : حاضر يا نور هوريكي الوش التاني و صدقيني انا هخليكي انتي اللي تجري ورايا يا نور بعد ما هعمل اللي انا عايزه و بالمره هجيب منك ولي العهد اللي قالت عليه صاحبتك حتى لو كان غصب عنك

نور : و ده مين اللي اوحالك بكده
عمر : انتي يا نور…و ده اللي هيحصل حالا فعلا
عمر بيشد نور من دراعها و بيرميها عالكنبه و اول ما بيقرب منها بتبدأ نور تصرخ و تقوله ابعد عني لو مبعدتش عني والله هموت نفسي
عمر : انا لو بعدت عنك دلوقتى هبقى استاهل كل اللي يجرالي
‏نور : بتزق عمر و بتجري عالمطبخ و بتجيب سكينه من هناك و بتقول : والله العظيم هموت نفسي قدام عينك لو قربت مني
‏عمر : انتي مجنونه اياكي تعملي حاجه ، خلاص انا مش هلمسك.. خلاص يا نور بكره ٱخر يوم في الشهر…و هنحدد معاد طلاقنا..
بعد ما عمر ساب نور و نزل بدأت نور تبكي و تصرخ و دخلت في حالة انهيار بس بعد شويه تمالكت نفسها و قالت بعد نفس عميق : خلاص كل حاجه هتنتهي بكره، الوعد و الوجع و الخوف و الامل الكذاب خلاص كده بكره مش هيكون ليهم وجود ولا ليك كمان يا عمر
تاني يوم الصبح بيرن تليفون البيت بيرد عمر : الو.. صباح النور ازيك يا ماما، الحمدلله احنا كويسين، مفاجأة ايه؟
اممم لا يا ماما اصل مش هينفع عشان نور مش هت.. حاضر يا ماما ثواني
بيتنهد عمر و بيقول : نور ماما عايزه تكلمك
بترد نور عالتليفون و هي مستغربة : الو ازيك يا طنط هههههه حاضر ازيك يا ماما، انا تمام الحمدلله.. حاجه ايه؟ سفر ايه و اجازة ايه ؟ اه بس والله يا ماما مش هينفع اصلي في كذا حاجه عندي المفروض اعملها و… يا ماما بس عشان.. بتتنهد نور و بتقول حاضر يا ماما اللي تشوفيه، و بعد ما بتقفل الخط بتبص ل عمر
عمر : انتي وافقتي على اللي ماما قالته؟
نور : ايوه وافقت
عمر : يعني هنسافر معاهم عزبة الفيوم نقضي اجازة هناك؟
نور : كان عندك حل تاني؟ انت شوفت مامتك كانت مصممه ازاي و اكيد انا مش هقدر اكون قليلة الذوق و اكسفها
عمر : طب تمام تقدري بقى تقوليلي هنقضي الاجازه دي ادامهم بنعامل بعض ازاي
نور : هيكون ازاي يعني، بنفس التمثليه اللي مثلناها عليهم من يوم ما اتجوزنا
عمر : معاكي حق، ماشي تمام كده
تاني يوم الصبح بتوصل عربية مالك اخو عمر و معاه احمد صاحبهم و اللي هياخدوا عمر و نور معاهم للعزبة

عمر : صباح الخير يا بائس منك ليه
مالك : صباح النور ياخويا
احمد : اهلا اهلا بعصافير الجنه
عمر : اسكت و النبي عشان شكل بوزك ده هو اللي جابني الارض
احمد : ايه ده ياسطى احيه يعني ايه؟
عمر : مفيش ياعم اسكت
احمد: يابني صارحني انا ستر و غطا عليك قول بسرعه قبل مراتك ما تنزل
عمر: ياعم اتنيل اتنيييل
بتنزل نور و بتفتح باب العربيه جنب عمر في الكنبه اللي ورا و بتقول : صباح الخير يا شباب ازيك يا مالك، عامل ايه يا احمد؟
احمد : الحمدلله انا تمام طمنيني عليكي انتي يا غاليه، قلبي عندك والله يا ضنايا
نور : يعني ايه؟ قلبك عندي ليه ياخويا
بيتدخل عمر بسرعه : ماهو مفيش هو بيحب يهزر هزار سخيف زي وشه
احمد بيبص لمالك و بيضحكوا
عمر : هتتحركوا ولا هنبات هنا؟
مالك : خلاص ياعم همشي اهه، اهدى شويه احنا محتاجينك
بتتحرك العربيه و في وسط اجواء الاغاني الهاديه اللي مالك شغلها و منظر الطريق اللي يسحر و السما اللي مليانه بغيوم الشتا نامت نور
بيبص عليها عمر بيلاقيها نايمه و الشباك مفتوح جنبها فبيقفله و بيغطيها بالجاكيت بتاعه
وبعد شويه بيوصلوا للبيت بتاعهم في عزبة الفيوم
نور كانت رايحه في نوم عميق و عمر كان مستمتع بإنه يشوفها و هي نايمه لان دي اول مره تحصل خصوصا انه مجتلوش الفرصه من ساعة جوازهم يعمل ده ولا مره
مالك : ايه يا عم فلانتينو انت هتفضل سرحان في السندريلا بتاعتك كده و مش هتنزل م العربيه
عمر : خلاص ياعم بصوتك ده هصحيها اتفضل انت انزل دخل الشنط البيت
بيبدأ عمر يحرك ايده على شعر نور و بصوت هادي بيقولها : نور اصحي احنا وصلنا
بتفوق نور و بتقوله ايه ده هو انا نمت كل ده و.. ايه ده ؟ ايه اللي حط الجاكيت بتاعك عليا؟

عمر : الجو برد و انا خفت تبردي
نور : طب و مخوفتش على نفسك تبرد وانت قالع الجاكيت يعني
عمر : صدقيني محستش بالبرد لحظه وانا باصص عليكي
نور بتبلع ريقها و وشها بيحمر و بترد بلغبطه : طب احنا ايه يعني هو احنا مش هننزل ندخل البيت يعني؟
بيضحك عمر و بيرد عليها : لا هننزل .. استني
بينزل عمر و بيلف و يفتح لنور باب العربيه و يقولها اتفضلي
نور بتبتسم و بتقوله شكرا و بيدخلوا البيت اللي كان عباره عن فيلا و حواليها جنينه بيحاوطها سور في وسط الاراضي الخضرا الواسعه
بتستقبل نور و عمر والد و والدة عمر و اخته نيرة اللي كانت اصغر من عمر ب 4 سنين و من مالك ب سنتين
بيرحبوا بنور و عمر و بيعرضوا عليهم الفطار لكن نور بتعتذر و بتقولهم انا محتاجه اغير هدومي و اريح شويه كده من السفر
ردت والدة عمر : على راحتك يا حبيبتي عموما مالك طلع شنطتك فوق في اوضتك انتي و عمر و متقلقيش نيرة غيرت لكم فرش السرير بتاعكم عشان متتعبيش نفسك
نور : سرير ايه؟ هو اممم هو فوق في الاوضه كام سرير
والدة عمر : سرير واحد يا حبيبتي بتاعكم يا عروسه، ايه انتي بتتكسفي تنامي جنب جوزك ولا ايه؟ هههههه ما تتكلم يا عمر
عمر بذهول : اممم لا لا طبعا هي بتتأكد بس مش اكتر
نور بتبص بغضب ل عمر اللي كان تقريبا هيغمى عليه من بصتها و بتبص لحماتها و تقولها : شكرا يا طنط انا هطلع اوضتي قصدي.. اوضتنا.

يتبع….

لقراءة الفصل التالي : اضغط هنا

لقراءة الرواية كاملة اضغط على : (رواية لن أعشق سواك)