روايات

رواية 30 يوم حياة 3 الفصل الرابع 4 بقلم أميرة أسامة

رواية 30 يوم حياة 3 الفصل الرابع 4 بقلم أميرة أسامة

رواية 30 يوم حياة 3 البارت الرابع

رواية 30 يوم حياة 3 الجزء الرابع

30 يوم حياة 3
30 يوم حياة 3

رواية 30 يوم حياة 3 الحلقة الرابعة

طلعت بوسي وسلمت علي الكل واعدت معاهم وفضلت عينها عالباب مستنيه صالح وبعد حوالي عشر دقايق دخل صالح
عامر…فينك يا عم كل ده الحلقه هتبدأ خلاص
صالح..كنت بجيب كارت شحن
عامر…طيب يلا تعالي اعد
خرجت شهد هي والبنات جايبين سندوشات كتير وفشار وفاكهه وعصاير وحلويات العيد بيجهزوا الاعده قبل الحلقه
صلاح…في حاجه ناقصه
عامر…ياعم مفيش انت كمان هتخيلنا انت واخوك اعد بقي الحلقه هتبدأ
روحيه..هو في ايه يا واد يا عامر عمال الحلقه هتبدأ الحلقه هتبدأ ايه يكنش السادات طالع يخطب😏
عامر…ما طبعا ليكي حق يا روحيه الاكل والحلويات اهم مني
روحيه…طبعا اهم
يوسف…باعتك وشكلك وحش
عامر….خليها براحتها تبقي تدور علي حد يخرجها
زين….سيبك منه ياروحيه انا هخرجك
روحيه….ان شالله يخليك يا ابو عيون حلوه انت🤔
يوسف…مانحترم نفسنا ياروحيه بقي عشان مزعلكيش بتعاكسي صاحبي ادامي
روحيه…يا اخويا اتنيل ادامك ولا وراك انا بيهمني
مديحه…بضحك روحيه عيارها فلت😂
يوسف…اه والله يا ديحه انا شكلي هحبسها في البيت عشان متجرسنيش
عامر….بس اسكتوا بقي الحلقه هتبدأ
روحيه…ياواد حلقه ايه دي اللي هتسكتنا عشانها
عامر…چو ابعد روحيه عني السعادي
يوسف…بس يا اما بقي بقولك ايه الواد عامر ومنار هيطلعوا الوقت مع مني الشاذلي اتفرجي عليهم
روحيه….مني الشاذلي دي جارتنا ياولا اللي عالناصيه بتبيع خضار
بصلها يوسف بطرف عينه😏
هيما…بضحك ايوه هي ياروحيه والوقت هتطلع في التلفزيون تطبخ الخضار اللي بتبيعه عالي شويه يا ابني😒😡
ضحكوا علي هيما وانتبه الكل للتلفزيون..
دخلت مني الشاذلي الاستديو وسط تصفيق حاد من الجمهور.
مني…العيد يعني لمه واعده حلوه وبهجه وسعاده العيد يعني مسرحيه العيال كبرت والواد سيد الشغال وشاهد ماشافش حاجه…العيد يعني حد يشاركنا سعادتنا العيد يعني سهره حلوه عالتلفزيون نتجمع كلنا ادامها…والحقيقه انهارده معايا ضيف شرفني قبل كده دخل قلوب الناس وحبوه في وقت قصير جدا عمل اول اغنيه ليه بسرعه بقت ترند وبعدها بكام يوم نزله فديو مع ست كبيره في السن في مركب بسيط عالنيل بيرقص معاها وبيحاول يخليها مبسوطه بأي شكل الفديو اتصور من ناس معاه عالمركب كان فديو باين طبيعي جدا وتلقائي الحقيقه نزل عالسوشيال ميديا وبسرعة البرق بقي ترند أول في مصر وكل المواقع والصفح بتداوله بشكل كبير الفديو دخل قلوب الناس كلها وقلبي بشكل خاص وعرفنا منه وعلي لسانه بعد كده لما شرفنا ان الست دي تبقي والدت صاحبه و لمجرد انه شافها باصه من الشباك وحزينه ساب كل اللي وراه وخدها خرجها بحب ورضا وسعاده..عرفنا قصته وفي وسط ما كنت بعمل معاه اللقاء عرفنا منه انه كان داخل في قصه حب غريبه شويه مقدرتش وقتها اضغط عليه بس بعدها بفتره لقيناه بيعلن عن معاد خطوبته من حب عمره دعاني لحضور فرحه والحقيقه اني سعدت جدا بالدعوه دي ويمكن تكون من المرات القليله اللي اروح فيها فرح وانا متشوقه ليه جدا وحابه اني اروح حكالنا عن المنطقه اللي عايش فيها كلمنا عن اهلها وحبهم لبعض كلمنا عن صحابه وجدعنتهم والحقيقه لما روحت شوفت كل ده بعيني شوفت ناس جميله وبسيطه مش بسيطه في الماده لكن بسيطه في الحياه قلوبهم نضيفه حبهم لبعض ظاهر والاهم اني شوفت روحيه😍 بطله الفديو الجميل اللي انتشر وكنت سعيده جدا اني شوفتها الفرح كان مليان ناس ومطربين ومشاهير لدرجه اني استغربت ازاي شاب او مطرب لسه في بدايت مشواره يقدر يوصل لحب الناس بالسرعه دي بس رجعت عند جمله من حبه ربه حبب في خلقه…شويه وشوفناه ترند وقت العاصفه وهو بيحاول هو وولاد الحته الجدعان ينقذوا ولد قبل ما يتكهرب من السيول…واخر ترند قلب الدنيا ظهوره هو وإيهاب اخوه اللي شرفنا معاه قبل كده في الاستديو في خناقه كبيره جدا والدنيا باظت خالص وطلع كلام كتير عليه عن البلطجه والشغب والمسير للجدل انه ألتزم الصمت ومدافعش عن نفسه بس الحقيقه انا شخصيا كان ليا رأي خاص الشاب ده بعيد كل البعد عن البلطجه فكان لازم يطلع معانا لتاني مره عشان يرد علي كل التساؤلات دي وعشان نعرف قصه الحب اللي خباها عننا اول مره وجالنا انهرده بنفسه لكن معاه حب عمره او حلمه زي ما قال
معانا ومعاكم المطرب الصاعد اللي دخل قلوب الملايين عامر حسني وخطيبته منار الشرقاوي😍
دخل عامر وهو ماسك ايد منار وسط تصفيق حار من الجمهور…وبمجرد ما دخل صحابه فضلوا يصفروا بفرحه وهو اعد يضحك ومنار مكسوفه وفرحانه😍
توته…ياختي جوز عصافير يا ناس😂😂
منار…اتلمي يا رخمه
منه…طلعتي في التلفزيون مين ادك يا بنت المحظوظه
وعد…بلاش حسد بدل ما النور يقطع😂😂😂
………
بعد ما الجمهور حياهم
اعدوا كلهم
مني….ازيك يا عامر
عامر….بخير الحمد لله
مني….انا مبسوطه انكم معايا انهارده
عامر…والله انا اللي مبسوط جدا ومبسوط ان الحلقه دي هتتعرض في العيد جدا وابقي جزء من فرحه ولمه الناس
مني….ازيك يا منار
منار..باحراج الحمد لله تمام
بصلها عامر وهو رافع حواجبه🙄🤨
مني ..بضحك بتبصلها كده ليه
عامر….لسه لسه مكسوفه مخادتش علي الجو😂😂
مني…بضحك لا الوقت هتندمج وهتاخد عالجو بسرعه المهم انا بباركلكم للمره التانيه علي خطوبتكم وبجد ياعامر حابه اشكرك ادام الناس علي دعوتك ليا
عامر…بابتسامه يا فندم انا اللي حابب اشكرك عشان قبلتي دعوتي وفرحتيني وفرحتي كل اللي شافوكي في الفرح
مني….الفرح كان جميل اوي يا عامر يمكن اكون مأعدتش كتير بس طبعا ده لظروف شغلي بس خليني اقولك ان اول مره ابقي ماشيه من فرح وانا مضايقه اني ماشيه عشان كده طلبت منك نسخه من فيديو الفرح والحقيقه اني لما شوفته كنت مبسوطه و سعيده جدا و أتشرفت بجد بيك وبأهل حتتك صقف الجمهور بحراره
عامر…بجد شكرا جدا لحضرتك انا والله اللي مبسوط بكلام حضرتك اوي
مني…عروستنا كنتي زي القمر بجد فرحت اني اتعرفت عليكي وفرحت ان حلمكم اتحقق
منار….شكرا لحضرتك بجد انا اللي مبسوطه اني شوفت حضرتك وانك شرفتينا في الفرح
مني….طيب قولولي بقي حكايتكم أبتدت ازاي وازاي الحلم اتحقق تحبوا مين يبدأ
منار…لا خليه هو
عامر….بتخلعي انتي كده علي طول😒
مني…بضحك دبستك صح
عامر….بضحك يلا مش مهم خليها عليا بصي هي الحكايه ليها تفاصيل كتير اوي ويمكن انا ومنار سننا مش كبير عالحدوته اللي هتتحكي دي بس هي حقيقيه.
انا ومنار جيران متربين مع بعض من واحنا صغيرين انا اكبر منها بسنتين يمكن بحب منار من واحنا لسه صغيرين اوي وهي كمان بس تقريبا كده عرفنا ده متأخر اوي.
مني…طيب وليه معترفتش بحبك ده
عامر…منار اخوتها أعز صحابي مش بس صحابي دول اخواتي وكل حاجه ليا
كريم اخوها اللي كلمتك عنه قبل كده الله يرحمه كنت بعتبره اخويا الكبير وكنت اوقات كتير بحسه ابويا مع ان الفرق بينا مش كبير كان تؤامي بمعني الكلمه كان بالنسبالي الموضوع صعب ان احب اخته وده وهو مش عارف بشوف ان الموضوع ده حساس شويه بين الصحاب…خصوصا لما فهمني غلط في مره وحسيت انه زعل مني كانت منار راجعه من درس قبل كده واقلامها وقعت منها وهي مش حاسه خدت الاقلام وجريت وراها علي مدخل البيت كريم شافني وللاسف كان في شباب من سسنا وقتها وتقريبا قالو كلام رخم فا هو اضايق وجه ورايا وقاللي فيما معناه يعني ان اللي حصل ده ميتكررش حقه طبعا لانها اخته وطبعا كان صعب عليا اوي اني اخسر صاحبي فا قررت ابعد خالص عشان مخسروش واخسر اهلها اللي هما اهلي وفضل حب منار في قلبي من غير ما اي حد يعرف وكمان كنت بحاول محتكش بيها كتير بس كنت عارف انها هتبقي ليا في يوم من الايام…لحد ما كريم اتوفي وقتها الدنيا اسودت خالص وكان جايلي سفريه لشرم كنت بفكر لسه بس بعد ما مات مقدرتش اعد وفعلا قررت اسافر واليوم اللي سافرت فيه عرفت ان منار بتحبني زي ما بحبها
مني….بتأثر عرفت ازاي
عامر…لا هي تحكي بقي الجزء ده
منار…فضلت متوتره وماسكه ايدها في بعض
مني…عرف ازاي يا منار
منار….انا اللي اعترفتله بنفسي
مني….انتي اللي قولتيله
منار….فالحقيقه موت كريم اثر فينا كلنا بشكل محدش يتخيله كريم كان شاب جميل اوي كان يتحب بجد مش مجرد اخ او صاحب او جار كريم الكل كان بيعتبره حد منه شخص قريب ليهم
كان بالنسبالي صاحب قبل ما يكون اخ اب قبل ما يكون صاحب كان كل حاجه ليا كان اقرب حد ليا بجد يمكن حواليا ناس كتير اوي قريبين مني صحابي مقدرش استغني عنهم شباب الحته صحاب عامر وصحاب كيمو حضرتك شوفتيهم دول اخواتي بجد وزي ما بيتقال عنهم زينه شباب السيده اهلهم هما اهلي
بابا ده اعظم اب فالدنيا بجد ومامتي بالنسبالي الدنيا ومافيها بس كان ليا شخصين قريبين اوي كريم اخويا الله يرحمه وعامر كان الشخص القريب اللي ميعرفش انه قريب لما راح كريم حسيت ان الدنيا قفلت في وشي وعرفت وقتها ان عامر مسافر مقدرتش استحمل ان الاتنين خلاص بعدوا عني كان صعب عليا كابنت اني اعترف بحبي للشخص اللي حبيته بس مكانش ادامي اي حل تاني ابدا غير اني اقوله واحاول اخليه يأعد ميسافرش
مني….كنتي عرفتي انه بيحبك
منار…لا مكنتش اعرف

 

 

 

مني…طيب مفكرتيش للحظه انه ممكن يكون بيحب او فكرتي مثلا ايه هيكون رد فعله لما تقوليله
منار…كنت عارفه ان عامر مش بيحب وحلمه انه يكون مطرب هو اللي شاغله بس كمان مفكرتش في رد فعله لما اقوله كده يمكن توقعت الرفض لاني عارفه انه مش بيحبني وحبيت اني اتوقع الاسوء عشان متصدمش اكتر بس كنت بحاول اني اقنعه يفضل ويتقبل حبي ليه يمكن يقدر يحبني
مني….باستغراب اد كده كنتي بتحبيه
منار…يمكن اكتر من كده المهم عرفت انه خلاص رايح عالمطار وقتها قررت اني لازم اتحرك قبل ما الحلم يروح من ايدي
اول حاجه عملتها روحت لعادل اخويا…وقولتله
مني…قولتيلو ايه
منار…عرفته اني بحب عامر واني مش عيزاه يمشي من غير ما يعرف اني بحبه
مني…طب ليه عملتي كده وكان رد فعله ايه
منار…عملت كده لاني متعودتش اني اكدب او اعمل حاجه من ورا اهلي والاهم ان مهما كان حبي لعامر عمري ما ينفعش اصغر اخويا ادام صاحب عمره هو بقي قاللي لو فعلا عايزه تعملي كده اعملي ده من غير تفكير وانا مش هعترض وكان متفهم جدا الموقف.وفعلا مشيت بسرعه ورحت ورا عامر كان راح عالمطار كلمته واستناني هناك لحد ما روحتله وقولتله
مني….حلو اوي ان الاخ يكون صاحب لاخته وحلو ان البنت تكون صريحه ومبتكدبش طيب قوليلي يامنار لما قولتي لعامر حصل ايه
منار…بضحك ما بلاش😒
عامر…خبي وشه بضحك ليه كده ده انا ما صدقت رضيت عني بقولك ايه هاتي سؤال غيره🙄
مني…بضحك لا مفيش غيره هو ده
منار….قاللي احنا اخوات وموافقش ابدا 😒😒
مني….بصدمه يا خبر يعني البنت تيجي وراك وتعترف لاخوها وتعترفلك وتقولها احنا اخوات طب قولها هفكر يعني المفروض بعد حبك ليها من وانت صغير هي جاتلك واختصرت الطريق المفروض واحد في مكانك ما يصدق
عامر….طب اعمل ايه هي طلعت كده 😂😂😂🙈 والله بجد انا اتصدمت واتلغبطت وحصلي حاجه زي لغبطه وتشويش
المشكله بقي ان بعد ما انا مشيت منار تعبت جدا ووقعت في المطار وراحت المستشفي وبعدها بكام يوم عملت عمليه كبيره في القلب
طبعا كنت انا وصلت شغلي وملخوم ومعرفش حاجه عرفت بعد عشر ايام كانت عملت العمليه واتنقلت العنايه المركزه نزلت فورا وانا حاسس ان روحي بتتسحب وواجهت نفسي وقتها بحبي لمنار وواجهتها علي اساس بقي تفرح وتشد حيلها وكده😏😒
شهور بجري وراها و اتحايل عليها انا وكل الناس وهي ابدا
مني…عندها حق يعني البنت تيجي وتعترفلك بحبها وانت تقولها لا وعايزها توافق بسهوله كده
منار…المشكله ان وقتها كنت شايفه انه هو بيعمل كده من باب اني صعبت عليه بيعمل كده شفقه مش حب وكان صعب اني اوافق وادوس علي كرامتي اكتر من كده قررت وقتها اني ابدأ حياتي بطريقه صح والغي قلبي خالص وبعدها اتخطبت لبني ادم بجد انا ما شوفتش انضف ولا احسن من قلبه
عامر…يمكن اتصدمت لما عرفت ان هي اتخطبت وقتها كنت مسافر ومكنتش اعرف اي تفاصيل عن خطيبها ولما رجعت شوفته لاول مره يوم فرح ايهاب اخويا وهيما صاحبي وقتها لما شوفته مكنتش اعرف انه خطيب منار انا شوفت صاحب دراستي وزميلي في معهد الموسيقي اربع سنين بس كانت صدمتي الاكبر لما عرفت ان صاحب عمري خطيب منار وقتها حسيت انه لا كده خلصت واتقفلت من تاني علي فكره انا سألته عنده مانع اني اقول عن اسمه ولا لا قبل ما اجي وهو معندوش اي مشكله
مني…ايه ده هو حد معروف
عامر….انس الراوي
مني…ايه ده مش ده المطرب😳
عامر…ايوه هو انس زي ما منار قالت مفيش في نضافه قلبه حد بجد محترم بيقدر الحب بجد هو حس وعرف ومقدرش يكمل ومقدرش يخلينا بعيد عن بعض والحقيقه ان اللي انس عمله عشان يجمعنا محدش عرف يعمله انس خلص اللي بينا في اعده صغيره
مني….الله بجد ده حد جميل نادر اوي لما تلاقي حد بالتفكير المتحضر والقلب النضيف ده
صقف الجمهور بحراره
عامر…ده حقيقي انس بجد بعتبره قدوه ومثال للحب الحقيقي والتضحيه بجد
مني…ربنا يارب يعوضه خير في حياته ومستقبله
عامر..يارب واشوفه احسن مطرب في الوطن العربي عشان هو يستحق ده بجد
مني….يارب يا عامر انت وهو وإيهاب تبقوا افضل مطربين وتحققوا نجاحات كتير في حياتكم ومستقبلكم
منار…عامر…يارب
مني…طيب خلصنا بقي من قصه الحب اللي الحمد لله انتهت نهايه سعيده. ايه بقي حوار الترندات ده احكيلي الاول عن واقعه الولد اللي انقذته و اللي بسرعه الفديو بقي ترند والناس كلها اتكلمت عن بطوله عامر حسني..
عامر….والله ولا بطوله ولا اي حاجه خالص
مني…واقف علي الواح خشب والدنيا غرقانه من السيول وبيقولو في كهربا ومش بطوله خلونا نشوف مع بعض الفديو كده
عرضت الفديو وبعد ما خلص فضلوا يصقفوا جامد
مني…ايه ده بقي 🙄
عامر…ايه😂. بصي هو اي بني ادم طبيعي في الموقف ده هيعمل اللي عملته بالظبط واللي يعمل غير كده ميبقاش انسان كل الحكايه ان يوم العاصفه اللي حصلت الدنيا عندنا غرقت بمعني الكلمه السيول دمرت الدنيا والميه طلعت قرب الرصيف العربيات اتغطي نصها من الميه المحلات باظط وغرقت
عمر..ده طفل صغير من الحته كان مربي كلبه من بتوع الشارع بيحبها جدا خرج عشان يجبها ويحميها من المطر خاف تغرق فضلت تجري وهو وراها مش عارف يجبها مره واحده سمعنا صوات مامته اصلا مكنش في مخلوق في الشارع الكل في بيته الدنيا غرقانه طبعا
خرجنا من البلكونات شوفنا المنظر مامته بتصوت وتقوله يرجع وهو ابدا فضلنا نزعأله من البلكونات وهو منشف دماغه بيجري علي الرصيف من فوق ومره واحده الكلبه بتاعته اتكهربت ادامه عرفنا وقتها ان في ماس في الميه
مني…ياخبر ابيض
عامر…هو بقي مقتنعش فاكرها مغم عليه او بتغرق بس لما اتاكد انها كهربا بقي يعيط والوقت ده الميه زادت وخلاص هتلمس السور اللي واقف عليه…طبعا انا معملتش اي حاجه
اللي كان بيعمل فعلا زين صاحبي الولد ده شغال معاه اصلا جري بسرعه جاب الواح خشب وبقينا نربطهم في بعض عشان تطول البلكونه اللي ادامنا وطبعا منعناه انه يطلع لان زين ماشاء الله عليه طويل اوي وعريض يعني استحاله اللوح ده يستحمله فضلنا في مين يطلع انت لا انت ميهنفع انت تقيل كل اللي بقوله ده يمكن يبان طويل بس الحوار كله ما ستغرقش ثواني فا قولت انا اللي هطلع انا اقل جسم فيكم وبعد نقاش سريع وافقو وفعلا عملت كده هما ماسكين اللوح جامد من ناحيه والجيران اللي ادامنا ماسكين وصلت لحد هناك حطينا سلم خشب والحمد لله قدرت انقذه
مني….بجد كان مشهد صعب جدا بحيكم كلكم عليه وكنت مصور ومنزل علي صفحتك ازاي بعد الميه ما اتسحبت نزلتوا كلكم تظبطوا المحلات اللي باظت كلكم ايدكم في ايد بعض وكنتوا مصور وانتوا بتوزعوا عيش علي اهل الحاره
منار…احنا اصلا كل الحاره كانت محبوسه 3 ايام بعد ما عرفنا ان الميه بتكهرب انا كنت عند وعد صاحبتي بنت خاله زين وعامر كمان كان هناك واضطرينا ناعد هناك وبعدها يوسف وروحيه جبناهم لانهم في دور ارضي والميه دخلت الشقه بس الحمد لله مشيوا قبل الميه ما تكهرب بقينا كلنا في البيت عند زين وطبعا باقي البيت جيرانا واصحابنا العيش ابتدا يخلص معانا كلنا فا كان لازم نتصرف الحمد لله كان في في الشقق اللي في البيت اللي محبوسين فيه دقيق كتير جارتنا وام اصحابي خبزت عيش وعملت بزياده لاننا توقعنا ان كل الناس معندهاش خلاص وفعلا مكنش حد عنده عيش خالص ابله سهير خبزت والشباب بقوا يوزعوا عليهم بخشب طويل اللي مش عنده بقي ياخد و يوصل للتاني لحد ما الكل بقي عنده
مني…يعني مش بس فكرتوا ازاي تسعفوا نفسكم وتبقو اد الموقف لا انتو كمان ساعدتو اهل الحته بحب حقيقي الشده بتبين معادن الناس
صقف الجمهور بحراره
مني…طيب قولي ايه حوار الخناقه بقي اللي قلبت الدنيا عليك انت وايهاب
عامر…ده كان تاني يوم فرحي صحيت علي صوت عالي بصيت لقيت زين بيتخانق مع شاب من الحتع الشاب ده اصلا مسجل وكان ليه معاه حادثه قبل كده ضربني بمطوه وثبتني هو واصحابه بليل وكانت ليله
مني…بضحك صريح اوي
عامر…بضحك هكدب ليه اه اتثبت😂😂بس هو خدني علي خوانه هو واصحابه المهم لقيت المنظر ده ادامي
اللي عرفته بعد كده طبعا بعد الفرح اغلب المحلات كانت قافله الكل كان تعبان من قبل الفرح فا خدوه اجازه عمر كان في الشارع بدري والشاب ده شافه ثبته وكان عايز ياخد منه فلوسه وضربه بالقلم علي وشه في نفس الوقت اللي خرج فيه زين
مني…عمر ده اللي انت انقذته برده
عامر…بضحك اه هو عمر مصايب كل مصيبه تيجي بسببه😂😂
المهم زين اتجنن حاش عمر من ايده وبقت الخناقه معاه كلنا نزلنا الخناقه كبرت وكان لازم يتعمل معاهم الصح شويه شباب مسجله بيضايقو اي حد بيثبتوا اي حد بيضايقوا اي بنت هما مش من شارعنا بس معروف عنهم البلطجه بس زين قاللي انا وايهاب نمشي عشان منتصورش ويحصل اللي حصل ده بس احنا رفضنا وكملنا الخناقه
مني…يعني كنتوا بتدافعوا عن طفل طيب ليه مطلعتش دافعت عن نفسك
عامر…بصراحه محبتش يمكن اضايقت لان الناس الوقت اول ما بتشوف حاجه بتحكم عليكي علي طول من غير ما يعرفوا السبب وعشان كنت أقول السبب كان اخري هنزل بوست ومش الكل هيشوفه فا فضلت التزم الصمت لحد ما تيجي فرصه زي أنهرده واتكلم
احنا مش بلطجيه ولا لينا في البلطجه احنا شباب بتحب الحق الحمد لله كلنا متعلمين متربين بس مينفعش اشوف الغلط واسكت عليه لمجرد اني مشهور واقول مليش دعوه
مني…فالحقيقه يا عامر انت واصحابك واهل حتتك مثال للجدعنه والشهامه اللي للاسف افتقدناها
صقف الجمهور بقوه
مني…طمني علي روحيه يا عامر
عامر…بضحك زي القرده مطلعه عنينا😂😂😂
…..
ضحك صحابه عليه
روحيه…شوف الواد القليل الادب😏
عامر…مش روحيه انتي..انتي حبيبتي
يوسف…لا يا اما يقصدك انتي 🤪
…….
كملوا الحلقه كانت عباره عن ضحك وهزار وحكايات وغنا ولعب حلقه جميله ومبهجه وانتهت الحلقه اخيرا
الكل كان مبسوط وقالوا رايهم عن الحلقه واد ابه كانت جميله…وطول الوقت صالح عينه رايحه جايه علي بوسي وهي مش مدياله اي اهتمام
خلص اليوم وانتهي بفرحه وسعاده ورضا
وعدي كذا يوم الوضع كان هادي رجعوا الشغل من تاني وكل واحد رجع لحياته الطبيعيه ونزلت وعد الشغل الجديد وهي مبسوطه وفرحانه جدا.
خرجت وعد من اوضتها وهي لابسه ومستعده لشغلها
وعد…صباح الخير يا خالتو
مديحه…يا صباح الفل ايه الحلاوه والنشاط ده كله
وعد…شكلي حلو
مديحه …زي القمر
خرج وعد من الاوضه وهو بيعدل التيشرت.وهو غيران
زين…وبتسألي علي شكلك ليه ان شاء الله راحه تتجوزي ولا راحه تشتغلي
مديحه…يا ابني مش لازم تهتم بمظهرها
وعد….ابتدينا غيره ياست ديحه🤨
زين….وايه المشكله لما اغير
مضيقاكي غيرتي في حاجه
وعد…لا طبعا بس زي ما خالتو قالتلك لازم مظهري يبقي كويس
حدفتلها مديحه بوسه 😘وردتها وعد بسرعه😘
زين…اه انتي متفقه عليا بقي انتي ومديحه انتي تغني وهي ترد عليكي
مديحه…انا راحه اجهز باقي الفطار واجيب الشاي وارحم نفسي من جنان الصبح ده
زين…😒😒اهربي اهربي يا مديحه ليكي اعده

 

 

ضحكت مديحه ومشيت ووقفت وعد حاطه ايدها علي بوئها 🤭
بصلها زين وهو شكله مضايق وعامل زي الاطفال
زين…مالك فرحانه كده ليه
وعد…وانت تكره اني ابقي فرحانه
زين…🙄لا طبعا مكرهش
وعد…طب قولي انت مالك مضايق كده ليه هو انت مضايق اني هشتغل
زين….ايه العبط ده اكيد لا طبعا بس بصراحه كده غيران عليكي شكلك زي القمر وبعدين بقي مش واخد انك متبقيش في البيت يعني كنت كل ما ادخل الشقه في اي وقت طول اليوم الاقيكي متعود ادخل اشوفك كل ما اخلص اب عربيه في ايدي الوقت لما هدخل مش هلاقيكي ومش هشوفك غير لما ترجعي
وعد…مسكت ايده بحب هكلمك كل شويه🥺
زين….لا مينفعش عشان انتي راحه تشتغلي يا هانم مش راحه تحبي وعشان مش عايز اي حد يشوفك مقصره في شغلك عايزك ترفعي راسي ولو عليا يا ستي هستحمل
وعد…خلاص هكلمك في البريك او كل ما اكون عارفه اتكلم ومتقلقش هرفع راسك
زين…عارف انك هترفعي راسي…بس اسمعي بقي مش عايز دلع ولا عايزك تتكلمي مع اي راجل غير في حدود. الشغل لا زميلي ولا مديري ولا شغل المرقعه ده انت عايز دكر في الشغل مفهوم
وعد وهي بتحاول تكتم ضحكها. حاضر 🤭
زين…وشعرك ده رجعيه لورا حطلها شعرها ورا ودنها🤨
وعد…كده تمام
زين…بقول ايه ما تلبسي طقم غير ده
وعد…وده ماله ماهو حلو اهو
زين…حاسس انه ماسك عليكي
وعد…زين علي فكره انت بتتلكك مش ماسك ولا حاجه متأخرنيش بقي😩
زين…مستعجله اوي😡
وعد😂😂😂 بحبك يا زينو
ابتسم زين…بحب وانا كمان بحبك
فطروا مع بعض وبعد وقت بسيط خرج زين ووعد راح يوصلها ورجع علي شغله
…..
قام عامر علي الضهر لبس وجهز نفسه..ونزل
اتصل علي منار وهو نازل
منار….الوووو
عامر….صباح الكسل انتي لسه نايمه
منار…هي الساعه كام
عامر…12ياكسلانه
منار….طيب اعمل ايه وانا ورايا حاجه اعملها انت نزلت
عامر…اه انا لسه بنزل عالسلم اهو
منار…نازل بدري كده ليه
عامر…مش بدري ولا حاجه يا حبيبي هفطر لسه وبعدين لازم اروح بدري لسه في بروڤا قبل الحفله وبعد كده هبتدي اجهز
منار….ربنا معاك يارب
عامر….اه والنبي ادعيلي دي حفله كبيره وقلقان اوي
منار…قلقان من ايه بس انت اول مره تغني في حفله
عامر…لا مش كده بس يمكن يكون اول مره اروح حفله فيها العدد الكبير ده
منار….متقلقش ان شاء الله هتعدي وهتبقي حفله جميله
عامر…يارب هتنامي تاني
منار…لا خلاص انا صحيت
عامر…هتعملي ايه في يومك انهارده
منار…والله ما عارفه لسه بس اكيد اعده في البيت يعني منار انهارده نزلت اول يوم الشغل مش هينفع اروحلها هشوف كده لو روحت لحد من البنات هعرفك
عامر…ماشي يا حبيبي يلا قومي كده خدي شاور وظبطي نفسك وافطري يلا
منار…حاضر خلي بالك من نفسك
عامر….وانتي كمان يا حبيبي يلا سلام
منار…سلام يا حبيبي
خرج عامر من باب البيت راح لوالده
عامر…وقف يطبل بايده علي الخشب…ياحلو صبح يا خلو طل يا حلو صبح نهارنا فل
صباح الرضا يا عم حسني
حسني…صباح الجمال ايه ماشي الوقت
عامر…اه عشان في تجهيزات كتير قبل الحفله ادعيلي يا عم حسني
حسني…ربنا معاك يا حبييي
ويوقفلك ولاد الحلال وينجحك
عامر…يارب ياعم حسني ويديك الصحه واشوفك احسن حد في الدنيا قولي فطرت
حسني…اه طبعا فطرت وانا هفضل مستنيك يا خويا كل ده
عامر…طب خلاص براحه متزأش كده الحق عليا كنت هجبلك احلي فطار ونفطر سوا
حسني…لا يا خويا كفي نفسك وبعدين مفطرتش فوق ليه
عامر…ياعم بقي انا لسه هقف واعمل فطار هجيب اي حاجه الوقت واكل
حسني….مفيش اي حاجه انت لسه ادامك يوم طويل وبتنسي نفسك في الاكل افطر الوقت قبل ما تمشي فطار يرم عضمك ويخليك تقدر تصلب طولك
عامر…ياااااعم حسني انا رايح اشيل حديد
حسني…اقوي ياواد ده بروڤات وتصوير وتسجيل ومناهده مع الفرقه ومناهده مع الجمنور واغاني ده انت بجيلك هبوط ومتقدرش تغني ووشك هيبقي تعبان
عامر…بااااس كل ده عشان مش هفطر 🤨وبعدين خلاص بقيت خبره في الحفلات مش سهل انت برده ياعم حسني كنت مقطع الحفلات زمان شكلك😉
حسني…بضحك اخر مره روحت حفله كنت ادك كده في القناطر
عامر…بضحك قناطر يا ابو عامر
حسني…ومالها القناطر ياواد مانت ياما اتفسحت فيها هتنسي اصلك ولا ايه
عامر…بضحك لا باعم مش هنسي اصله من فات قديمه تاه وبعدين خف عليا عيب ابنك بقي فنان شكلي هيبقي وحش لو حد سمعني بتزهأ كده البرستيچ هيضيع
حسني….ماشي يا اخويا المهم متمشيش قبل ما تفطر
عامر…حاضر هروح اشوف الواد صالح ولاحه اخليهم يعملولي كوبايه شاي وهبعت اجيب صنيه فطار جامده فول وطعميه وبطاطس ماتيجي تاكل
حسني…شوف ابن الكلب كان بيديني محاضره عالبرستيچ ورايح ياكل فول وطعميه
عامر…بضحك ماقولنا من فات قديمه تاه ياعم حسني سلام😂😂
حسني…بضحك سلام يا ابن الكلب😂😂
……
عامر….صباح حاير طاير من النجم الكبير عامر حسني محبوب الملايين القمر العسل الكيوت
صالح….فييييي ايه ياعم انت بتسوق لنفسك 😡
عامر…في ايه ياض مالك انت غيران ليه اه قمر وكيوت ونجم الملايين
صلاح….بضحك انت بتدور علي عروسه
صالح….قوله جاي يقرفنا عالصبح
عامر…تصدق ياض انت. وهو انا غلطان ان جاي اصبح عليكم قبل ما اروح الشغل
صالح…طب خلاص تعالي اعد هعملك كوبايه شاي
عامر…لا انا زعلام😒
صالح…بابتسامه ياض اعد متضايقنيش بقي
عامر….ولا انا صاحي مبسوط وش اهلك اللي شبه فرده الجزمه ده اعدله
صالح…عدلناه عشان خاطر النجم
عامر..طب احري انجر اعملي احلي كوبايه شاي
صالح…انجر ماشي ياعم حقك وايه كمان
عامر…اغسل الكوبايه كويس وطهرها عشان الجراثيم وهاتلي ازازه مايه معدنيه تكون مقفوله محدش لمسها وروح هات فوطه امسحلي الكرسي.
صالح…جري وراه امشي ينعل ابو اللي يعرفك ياواطي
وقف صلاح ميت من الضحك احسن جبته لنفسك يعني ملقتش غير صالح ده خلقه في مناخيره
رجع عامر براحه…في ايه ياعم مال خلقك كنز كده ليه
صالح…وهو كاتم ضحكته…هتأعد بأدبك اعد هتتنك علينا امشي من هنا بدل ما احميك بالمايه
عامر….خلاص ياعم هأعد بأدبي يخربيت معاملتك للزباين😒
صالح…حوش ياض الفلوس اللي بتدفعها
زين…بضحك من بعيد اديله ياصالح ده عايز يتربي
جه هيما عليهم
هيما…مال صوتكم عالي كده ليه عملك ايه الواد ده
عامر…والنبي يا ابني ما عملت حاجه طلبت شاي ومايه بس🙄
صالح…بس😡
هيما…بضحك عملت ابه في الواد يا مصيبه
عامر…قولتله يغسل تلكوبايه كويس ويطهرها ويجيب فوطه ينضفلي الكرسي وازازه مايه معدنيه عشان الجراثيم
هيما…بضحك والله كويس انك لسه عايش😂
صلاح…لا ماهو لو مكانش جري كان موته😂😂
هيما…بقولك ايه اعملي اتنين قهوه مظبوط الله يباركلك يا لاحه
صلاح…عيني
صالح….هروح اعملك الشاي عشان تطفحه وتورينا عرض قفاك
عامر…شايف المعامله يا هيما😒
هيما….بضحك😂😂 لا مالكش حق يا صالح
براحه عالنجم
صالح…ماشي يا اخويا انت كمان بص لعامر انت فطرت ياض قبل ما تروح شغلك كده😒
عامر….😒😒وانا لحقت اكمل باقي طلباتي البعيد جري ورايا زي الطور سديت نفسي منك لله
صالح…شوف الواطي ده
هيما…خلاص عندي انا ديزحقك عليا يا ابو الرجوله عيل وغلط
صالح…عشان خاطرك انت بس

 

 

 

عامر….طب يلا اجري وصيلي علي صنيه فطار تستاهل الفنان😏
صالح…قوم يلا من هنا لا شاي ولا فطار يلا غور من وشي
عامر…بضحك الله ما كله بحسابه
صالح…حساب مين يا شحات ياض انا لو فتحتلك كشف حساب هخليك تبيع هدومك
عامر…شايف قلت الادب يا هيما شايف المعايره
هيما…انت زودتها اوي صراحه انا لو مكانه اشقك نصين
عامر….والله انا ماليا غير زين حبيبي ابو الرجوله كلها
زين…مش فاضيلك يا ظريف لو جيت هنا هكسر رجلك
هيما…بضحك اهو باعك
صالح…محدش طايقك انا لو منك انتحر
عامر…خلاص انا رايح مع هيما حبيبي
هيما….اخلص يا لاحه ورايا شغل🙄
عامر…بقت كده ياعني خلعتوا كلكم طب وربنا لا انا رايح افطر علي عربيتي ولا الحوجه ليكم يا كلاب.
نادي عليه حسني
حسني….عامر ولا يا عمر تعالي جبتلك صنيه الاكل اهي
عامر…حبيبي يا عم حسني ياللي مليش غيرك جري خد منه الصنيه ورجع حطها علي العربيه..
عامر…الفول السخن اوعي الطعميه
فضلوا كلهم يضحكوا عليه
هيما…ولا يا عامر ما تجيب طعميه
صلاح…وانا كمان
صالح…ريحتها حلوه اوي
عامر…اللي هيقرب هشرحه😡
دخل عليه صالح ولاحه وهيما وانقضوا عالغطار معاه
وفطروا وهما ميتين من الضحك واللي رايح وجاي بيبص عليهم
زين….ضحكوا عليك يا خايب
عامر…اعمل ايه في طيبه قلبي تعالي افطر يلا
زين…لا مش قادر انا فطرت
صالح…انا كلت هروح اعملك الشاي
عامر…بسرعه 😒😒
صالح…عيني يا سي عامر
عامر ايوه كده
زين….كسر عينكم خلاص طب وربنا حقه😂😂
عامر…مسيطر انا من يومي
بعد وقت بسيط مشي عامر وكمل الكل شغله..
……….
خرجت توته من المطبخ
توته…امسكي يا اما الشاي
سهير…تسلم ايدك
توته… تسلمي يا اما عم احمد ما طلعش معاكي لبه ياعد معانا بدل ماهو اعد لوحده
سهير….ده نزل باند مع ادهم وهيما شويه في الصاله
توته…عامل ايه معاكي يا اما مبسوطه معاه
سهير…الشهاده لله الراجل محترم وطيب وحنيه الدنيا فيه بيعمل اي حاجه تفرحني
توته…عم احمد انا ما شوفتش في حنيته بصراحه
سهير…بقولك ايه خليني في اللي طلعالك عشانه
توته….خير يا اما
سهير…الاول شوفي ابنك بيحط ايه في بوئه
توته…متخافيش دي عضاضه عشان سنانه
سهير…احسن يبلعها يابت
سهير….يا اما انتي كمان هتعملب زي ادهم يبلع ابه هو جاموسه انتي مش شايفه العضاصه اد ايه
سهير…وهو انا هسلك معاكي في الكلام يا بنت الجزمه😒 المهم عيزاكي تتكلمي مع بوسي انتي وادهم بالعقل كده في موضوعها عي وصالح
توته…ياما احنا تعبنا كلام معاها هي منشفه دماغها انتي هتوهي عن دماغ بوسي
سهير…لا مش هتوه عارفه ان دماغها جزمه قديمه بس انا يابنتي تعبانه عشانها مابنامش من تفكيري فيها ونفسي اطمن عليها والبت مش بتديني فرصه اكلمها ابدا بتقفل في الكلام ومش سامعه غير صوت دماغها وبس
توته…..حاضر هكلمها تاني بس ان جيتي للحق يااما هي عندها حق سبيها تربيه عشان يعرف قيمتها
سهير…يابت الواد بيحبها
توته…عارفه انه بيحبها وان هي كمان بتحبه بس هو جرحها يا اما واستغنى عنها بسهوله ولو رجعتله بسهوله
هيبقي سهل انه يجرح فيها كل شويه لازم يتعب شويه ويصلح اللي بوظه عشان يعرف قيمتها انا عارفه انهم هيرجعوا لبعض عشان الاتنين ميقدروش يستغنوا عن بعض بس لازم ترجع وهي كرامتها متصانه وهو حاطتها فوق دماغه
سهير…يابت انا عارفه كل اللي بتقوليه ده بس قلبي حزين عليها دي ملحقتش تأعد شهرين في بيتها حاجتها كلها بورقها
توته….مانا كمان حزينه عليها بس ده نصيب يا اما ومحدش عارف اللي جاي هيحصل فيه ايه سبيها علي ربنا ولن شاء الله ربك هيسهلها
سهير…يارب يا توته المهم كلميها والنبي
توته…هكلمها والله هخليها تيجي تتعشي معانا في يوم ونكلمها انا وادهم انتي بس قولي يارب
سهير…يارب وبصت علي ولاد توته…يابت بصي لعيالك وشوفي بيحطو ايه في بوئهم
توته…يا اما انتي طالعه تروشيني قومي يا اما روحي بيتك عم احمد بينادي عليكي😒😒
سهير…..انا غلطانه اني خايفه عليهم يا واطيه
توته…بضحك لا يا اختي متخافيش.
…………

 

 

 

في عياده سهر..خبطت عليها السكرتيره وبلغتها ان في حاله بره
سهر…خليم يتفضلوا
ثواني ودخلت عليها بنت عندها حوالي 23 سنه وشاب عنده حوالي 20 سنه
سهر…اهلا اتفضلوا
اعدوا ادامها
سهر….اهلا بيكم
البنت…اهلا بيكي يا دكتوره
سهر…مين فيكم اللي جاي
البنت….فالحقيقه احنا الاتنين
سهر…طيب عرفيني عليكم
البنت…انا ريم وده محمد اخويا
سهر….اهلا بيكم احكيلي يا
ريم ايه سبب الزياره
ريم….انا عندي 23 سنه مخطوبه وهتجوز علي العيد الكبير ومحمد اخويا اصغر ريم ب3 سنين عنده عشرين سنه في الحقيقه انا فكرت كتير قبل ما اجيلك بس لقيت انه مينفعش ماجيش لاني محتاجه اتكلم وتقريبا احنا مشكلتنا واحده
سهر….اولا انا بحيكي عشان لما حسيتي بمشكله جيتي ومكابرتيش عموما احكيلي حكايتكم وانا سمعاكم
ريم…يمكن دي اول مره نخرج من البيت انهارده عشان نجيلك بقالنا حوالي شهر ونص حابسين نفسنا في البيت لحد ما حسين ان نفسيا مش مظبوطين وعندنا اكتئاب فظيع
سهر…طب وايه السبب في الحاله دي
ريم…ماما
سهير….خير
ريم…سكتت وحست بالاحراج
سهر…اتكلمي ياريم مفيش اي داعي للاحراج اعتبري نفسك بتتكلمي مع نفسك في المرايا
ريم….ماما عندها 47 سنه من حوالي شهرين كده تعبت اوي كانت معدتها تعبانه والاكل ما بتستحملهوش وبمجرد ما تحط حاجه في بوئها تجيب كل اللي في معدتها كانت رافضه الاول تروح لدكتور لحد ما في يوم كانت واقفه معايا بنضف انا وهي الشقه وقعت مني واغم عليها فضلت اتصرخ لحد ما اخويا كان في الشارع طلعلي علي طول واتصلنا بي بابا جه جري من الشغل جبنالها دكتور…ووقتها اتصدما صدمه عمرنا لما عرفنا انها حامل….فالاول كنت فاكره ان الدكتور غلطان في تشخيصه بس يعد كده اتاكدنا بابا رد فعله كان غريب اوي فرح جدا واتبسط بالخبر ده مع اني شايفه انها حاجه متبسطش ابدا اتكلمت معاها انا واخويا عشان نعرف هتعمل ايه قالت ولا حاجه ربنا اداني هديه من عنده في سني ده انا وابوكي واكيد مش هزعل وده كان رأي بابا بردو حاولنا كتير نقنعها انها تنزله رفضت مفكرتش في شكلي ادام اهل خطيبي ولا ادم الناس مفكرتش في اخويا اللي بقي شاب وليه صحاب كتير هيبقي ايه لما يعرفوا ان امنا حامل في سنها ده..
سهر…الكلام ده كان من شهر ونص
ريم…ايوه

 

 

 

سهر….طيب والفتره اللي فاتت دي كنتوا بتحاولوا بردو تقنعوها
محمد…فالحقيقه من بعد ما كلمناها هي وبابا رفضوا رفض تام وكانهم حطونا ادام امر واقع وبعدها لقيناهم بيعروفوا الناس اللي حوالينا واحده واحده لحد ما كل الناس اللي حوالينا عرفوا ومن وقتها واحنا تقريبا مش بنتكلم معاهم نفسيتنا فالارض مش قادر انزل الشارع ولا قادر اروح الجامعه ولا بذاكر ولا بفتح موبايلي
مني…وانا مش بتكلم مع خطيبي خالص هو عرف هو واهله ولما عرفت ده قفلت موبايلي ورفضت اني اتكلم جالي البيت كذا مره رفضت اقابله المشكله ان مامته واهله اكيد مش هيسكتوا وهيسمعوني كلام زي الزفت وبصراحه حقهم هو بيحبني انا عارفه بس غصب عني انا مش قادره
عارفه ان مفيش حل خلاص ماما دخلت في الشهر التاني او نص التاني كمان لان لما الدكتور عرف انها حامل كان بقالها حوالي 3اسابيع
بس انا جيالك عشان حاسه ان مفيش ثقه في نفسي خايفه اواجه وكمان محمد حالته النفسيه وحشه جدا ومش عارفين نعمل ايه
سهر…ممكن اسألكم سؤال
محم…ريم…اكيد
سهر….ايه السبب اللي مخليكم رافضين الحمل ده
محمد بغضب…المبدأ مرفوض اكيد ازاي ماما وبابا مش صغيرين يعني ايه ولادهم شباب ويروحوا يجيبوا عيل هما مش خايفين علي منظرهم طب منظرنا احنا ايه ادام الناس
ريم….هما فكروا بانانيه ازاي مفكروش فينا وفي نفسيتنا
سهر….طيب هتزعلوا لو اتكلمت معاكم بصراحه
ريم…اكيد لا
سهر….انا اسفه انا شايفه ان انتم اللي انانيين جدا
ريم…احنا
محمد…طب ليه
سهر…..انتو فكرتوا في الناس وفي صحابكم وفكرتي في ناسيبك لكن مفكرتيش في امك محدش فيكم فكر هي ممكن نفسيتها تكون عامله ازاي من معاملتكم لبها
ريم…بس هي اللي غلطانه مش احنا هي اللي حطتنا وحطت نفسها في الموقف ده
سهر….هو اصلا انتو باي ذنب تحاسبوها هي اللي امكم ولا انتو مامتك معملتش حاجه غلط هي وباباكم
ريم….طيب والسن ازاي مفكروش في سنهم وشكلهم ادام الناس
سهر…اولا هي مش كبيره 47 مش كبيره في ناس ادها بيتجوزوا كبار وبيحملوا وبيخلفوا
محمد…بس دول ليهم ظروف خاصه وبتبقي اول خلفه ليهم مش معاهم شباب
سهر…افهمني يا محمد انتوا عملتوا حساب الناس اكتر ما عملتوا حساب مامتكم وبباكم جرحتوهم ووجعتوهم في اكتر وقت محتاجنكم فيه وبالاخص مامتك مين قالكم ان هي متحرجتش منكم لما عرفتوا اكيد اتحرجت بس خلينا متفقين علي اهم حاجه
اللي حصل ده لاهو عيب ولاهو حرام مامتكم حملت من باباكم في الحلال ليه بتعملوها علي انها فاتها السن او انها اجرمت او عملت حاجه غلط ده نصيب وقدر هي اتحطت فيه مش هنصلح الغلط بغلط اكبر ونجبرها انها تقتل روح وبعدين لو هي وافقتكم عشان خاطر متخسروهاش مفكرتوش ان هي ممكن عشان سنها ده تخسر حياتها وتعرض نفسها للخطر انتوا بجد فكرتوا بأنانيه انتي فكرتي في خطيبك واهله ونسيتي مامتك مع اني شايفه انه لو بيحبك بجد مش هيفرق معاه ومش هيتكلم في حاجه متخصهوش اصلا ولو انتي شايفه اهله هيسمعوكي كلام ملهوش لازمه هتقدري بالادب توقفيهم عند حقهم وتعرفيهم ان ده شئ ميخصهمش يتكلموا فيه ولا حتي تديهم الفرصه لده وتقفي في ضهر مامتك وترفعي راسها وانت خوفت علي منظرك ادام صحابك شيفاك ماشاء الله راجل منتاش صغير يعني وتقدر توقف اي حد عند حده وبردو بالادب انت المفروض ضهر مامتك وحمايتها هي معملتش حاجه غلط عشان تقفلوا موبيلاتكم وتعتكفوا في البيت ومتكلموش حد ده انتو كأنكم شايفين ان اللي حصل ده يكسر العين
للاسف انتوا حكمتوا علي مامتك كسرتوها وخلتوها حزينه قاطعتوها وبتعاقبوها علي حاجه ملهاش ذنب فيها
ريم…ايوه بس
سهر…مفيش بس باريم خلوا عندكم ثقه في نفسكم متخلوش حد يدخل حياتكم ويتكلم عنها انتو ابطال حكايتكم مش من حق اي حد انه يكون ليه دور فيها مامتك لما هتحمل وتولد محدش هيجي يديها من صحتها عشان تخافو من كلام الناس بباكم لما هيصرف ويشتغل محدش هيجي يساعده ويديله من روقه لو كل واحد فينا خاف من كلام الناس هنأعد معتكفين في بيوتنا متدوش حد اكبر من حجمه اقفوا جنب مامتكم وبباكم وادعموهم وخلوا اي حد يشوفكم من الانتوا خايفين منهم دول يشوفكم مبسوطين وراضين ومش هاممكم اي حد وكلامهم تحت رجليكم اللي حابب يكمل معاكم حطوه علي دماغكم واللي مش حابب نزلوه تحت رجلكم انتو اقويا محدش بهدكم بكلمه ولا انتوا عاملبن عامله عشان تستخبوا وخايفين من الفضيحه انتوا جابلكم رزق متعرفوش ايه حكمه ربنا فأنه يديكم الرزق ده في سنكم وفي التوقيت ده بالذات مترفضوش اي رزق جاي من عند ربنا وتجرحوا مامتكم وبباكم عشان ناس بيتكلموا علي الفاضي والمليان…الناس طبيعتها بيتكلموا حتي لو كان البني ادم كامل روحوا راضوا مامتكم وببباكم افرح اومعاهم بالرزق اللي جايلكم ارفعوا راسكم وراسهم قربوا من بعض اكتر خدوها في حضنكم وطبطبوا عليها
ريم…بدموع يمكن انا كنت جايه هنا وانا بجد واخده موقف من ماما وبابا بس بعد كلامك ده حسيت اني فعلا انانيه جدا وحسيت اني فعلا زعلتها اوي الفاره اللي فاتت
سهر…محدش فينا ياريم ما بيغلطش كلنا بنغلط بس اننا نعترف بغلطنا ده الاهم
سهر….راضي مامتك يا محمد والصاحب اللي ينتقدك او بنتقد اهلك يبقي ميستاهلكش اوقات بنتحط في مواقف عشان نغربل الناس من حوالينا اعتبر ان ده اختبار واللي هينجح فيه تبقي كسبته مدي الحياه واللي هيخسر يبقي ربنا اختارلك ده
محمد…مش عارف اقول لحضرتك ابه حقيقي ارتاحت بالملام مع حضرتك ويمكن تكوني فتحتي عيني عن حجات مكنتش شايفها من الغضب
سهر…تطلعوا من هنا عالبيت تراضوا مامتكم وبباكم هما اللي باقينلكم
محمد…ريم…حاضر

يتبع…

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

شركة عزل خزانات بالرياض
كشف تسربات المياه بالدمام
كشف تسربات المياه
الشركة الالمانية لابادة الحشرات بالقاهرة -----

عزل اسطح بالرياض

كشف تسربات المياه بالرياض

شركة عزل اسطح بالرياض

شركة تسليك مجاري

شركة تنظيف خزانات المياه الرياض

كشف تسربات المياه بجدة

شركة تنظيف بجدة

موقع رشحلي مكان

-

شركة نقل اثاث بالرياض 

نقل اثاث بالرياض 

نقل اثاث 

شركة عزل خزانات بالرياض

كشف تسربات المياه

رش مبيدات بالرياض

كشف تسربات المياه

شركة عزل اسطح بالرياض
تمديد غاز مركزي بالرياض